හැකි තරම් ඇමැතිධූර ලබා දී සියලු දෙනා සතුටු කිරීමේ ක්‍රමවේදයට තිත තබමින් එකම කාර්ය සිදු කරන අමාත්‍යාංශ කිහිපයක් වෙනුවට ඒ සියල්ල ඒකාබද්ධ කර තනි අමාත්‍යාංශයක් ගොඩ නැගීමට ජනපති කටයුතු කරමින් සිටින බවත් රටේ අනාගතව ගැන සිතා හෝ ඒ සඳහා සියලු දෙනා ගේ සහය එතුමාට ලබදිය යුතුව තිබෙන බවත් ආයෝජන ප්‍රවර්ධන රාජ්‍ය අමාත්‍ය දිළුම් අමුණුගම මහතා පවසයි.
පාර්ලිමේන්තුව නියෝජනය කරන සියලු දෙනා ඇමැතිවරු විය යුතු බව කියමින් එසේ නොවන්නේ නම් ජනපතිට අපගේ සහය නැතැයි පවසන්නට කවුරුන් හෝ උත්සහ කරන්නේ නම් එය අනුමත කළ නොහැකි බවත් පසුගිය කාලයේ ඒ ආකාරයෙන් සිතූ අය සතුටු කිරීම සඳහා ඇමැති ධූර ලබාදීමේ ප්‍රතිපලයක් ලෙස එකම කාර්ය කිරීමට ඇමැතිවරු දෙතුන් දෙනා පත්ව සිටි බවත් ඒ මහතා කීය.
මහනුවර දී (25) දා මාධ්‍ය හමුවේ අදහස් දක්වමින් අමුණුගම මහතා මේ බව ප්‍රකාශ කළේය.
කර්මාන්ත අමාත්‍යාංශය සඳහා එක් ඇමැතිවරයෙකු සිටිය දී ආයෝජන ප්‍රවර්ධන ක්ෂේත්‍රය වෙනුවෙන් තවත් ඇමැතිවරයෙකු පත්කර තිබෙන බවත් මේවා සම්බන්ධව විශේෂ අවධානයක් යොමුකර එකම විෂය පථය ඇති අමාත්‍යාංශ එක්කර එක් ඇමැතිවරයෙකු යටතට පත් කිරීමට ජනපතිවරයා ගේ අවධානය යොමුව තිබෙන බවත් හෙතෙම අවධාරණය කළේය.
එහි එක් පියවරක් ලෙස කෘෂිකර්ම අමාත්‍යාංශය යටතට වැවිලි කර්මාන්ත අමාත්‍යාංශය පත්කර තිබෙන බව ද ඒ මහතා කීය.
සෞඛ්‍ය අමාත්‍යාංශය තුළ පසුගිය කාලයේ දී ඇති වූ ගැටලු හා අර්බුද හේතුවෙන් වෛද්‍යවරයෙකු අදාළ ඇමැති ධූරය දැරීම සුදුසු බවට ජනපතිවරයා තීරණය කර තිබෙන බවත් එම තීරණය හා තමන් ද එකඟ වන බවත් කී ඇමැතිවරයා මෙවර ඇමැති ධූර දරන ලද පුද්ගලයින් වෙනස් වුවත් ඇමැතිවරු සංඛ්‍යාව වැඩි වී නොමැති බව ද අවධාරණය කළේය.
කෙහෙලිය රඹුක්වැල්ල මහතා සෞඛ්‍ය ඇමැති ධූරයෙන් ඉවත් කළේ එතුමාට එල්ල වූ චෝදනා සම්බන්ධයෙන් දඬුවමක් ලෙස නොවන බවත් අදාළ ක්ෂේත්‍රය පිළිබඳ පුළුල් අවබෝධයක් තිබෙන වෛද්‍යවරයෙක් ඊට පත් කිරීම මගින් ඖෂධ හා සම්බන්ධ පවතින ගැටලු නිරාකරණය කර ගැනීමට වැඩි අවකාශයක් සැලසේ යැයි යන විශ්වාසය මත බවත් රාජ්‍ය ඇමැතිවරයා ප්‍රකාශ කළේය.
මෙතෙක් කල් ක්‍රියාත්මක වූ ඇමැති ධූර හැකි තරම් ලබා දී සියලු දෙනා සතුටු කිරීමේ ක්‍රමවේදයෙන් බැහැරව ජනපතිවරයා අවශ්‍යතාව අනුව සුදුසු අයට ඇමැති ධූර ලබාදීමේ වැඩපිළිවෙළක් ක්‍රියාත්මක කරන බවත් ඊට සියලු දෙනා ගේ සහය ලබාදිය යුතුව තිබෙන බවත් ඒ මහතා පැවසුවේය.
පොහොට්ටුවේ මන්ත්‍රීවරුන්ට අවස්ථාව නොදී ඇමැතිවරු සංඛ්‍යාව වැඩි කළේ නම් තමන් ද එහි දී ඊට එරෙහිව හඬ නගන බවත් මේ අවස්ථාවේ ඒ ආකාර ඇමැති ධූර වැඩිවීමක් සිදුව නොමැති බව අප තේරුම් ගැනීම වැදගත් බවත් ඒ මහතා කීය.
විදුලි බල මණ්ඩලයේ ආදායම් සහ වියදම් තුලනය කිරීම සඳහා විදුලි බිල වැඩි කරන ලෙස ජත්‍යන්තර මූල්‍ය අරමුදල පවසන පරිදි විදුලි බිල වැඩි කිරීමෙන් ඉදිරියේ දී රටේ විදුලි බල මණ්ඩලය හැර වෙනත් කිසිදු අමාත්‍යාංශයක් ඉතිරි නොවනු ඇතැයි ද පවතින තත්ත්වය තුළ නව ආයෝජකයින් ගෙන ඒම තබා පැමිණ සිටින ආයෝජකයින් රඳවා ගැනීමත් ගැටලුවක් යැයි ද ඇමැතිවරයා පැවසුවේය.
(කේ.එල්. සුරවීර මහනුවර)
