ඉන්දියානු සාගර කලාපයේ ආරක්ෂාව සඳහා අධි තාක්ෂණයෙන් යුත් නවීන පන්නයේ විමර්ශන ගුවන් යානා දෙකක් ඉදිරියේදී ශ්‍රී ලංකාවට හිමිවන බව ගුවන් හමුදාපති එයාර් මාර්ෂල් උදේනී රාජපක්ෂ මහතා පවසයි.

Beach King 360 ER මාදිලියේ ගුවන් යානයක් මෙම වර්ෂය අවසානයේදී ඇමරිකාවෙන් සහ ජනාධිපති රනිල් වික්‍රමසිංහ මහතාගේ මැදිහත්වීම මත ඕස්ට්‍රේලියාවෙන්ද එවැනි තාක්ෂණයෙන් යුත්  ගුවන් යානයක් ලබන වර්ෂය මුලදී මෙරටට හිමිවන බව ගුවන් හමුදාපතිවරයා කීවේය.

ශ්‍රී ලංකා ගුවන් හමුදාව ශ්‍රී දළදා මාලිගාවේදී වාර්ෂිකව සංවිධාන කරන දානමය පුණ්‍ය කර්මය නිමිත්තෙන් මහනුවරට පැමිණ (23) දා සියම් මහ නිකායේ මල්වතු හා අස්ගිරි  මහා නායක හිමියන් බැහැ දැකීමෙන් පසු මාධ්‍ය හමුවේ ගුවන් හමුදාපතිවරයා මේ බව ප්‍රකාශ කළේය.

අස්ගිරි මහා විහාරයට පැමිණි ඒ මහතා එහිදී අස්ගිරි පාර්ශවයේ මහා නායක අතිපූජ්‍ය වරකාගොඩ ඤාණරතන හිමියන් බැහැ දැටු අතර අනතුරුව මල්වතු මහා විහාරයේදී එම පාර්ශවයේ මහා නායක අතිපූජ්‍ය තිබ්බටුවාවේ ශ්‍රී සිද්ධාර්ථ සුමංගල හිමියන් බැහැ දැක ආශිර්වාද ලබා උන්වහන්සේ සමඟ සුහද පිළිසඳරක නිරත වූහ.

අනතුරුව මාධ්‍ය හමුවේ අදහස් දැක්වූ ඒ මහතා රට මෙන් කිහිප ගුණයක විශාලත්වයෙන් යුත් ශ්‍රී ලංකා මුහුදු කලාපයේ ආරක්ෂාව වෙනුවෙන් අදාල රටවල් රැසක ආරක්ෂක අංශවල දායකත්වයෙන් විශේෂ සමුළුවක් පැවැත්වූ බවද කීවේය. ඒ සඳහා කලාපීය රටවල් රැසක සහයෝගය හිමිවන බවත් ශ්‍රී ලංකා මුහුදු කලාපයේ ආරක්ෂාව සෙසු රටවල් සඳහාද සෘජුව බලපාන බව ගුවන් හමුදාපතිවරයා කීහ.

ඒ අනුව මෙරට මුහුදු ආවේක්ෂණය සඳහා ඉන්දියානු නාවුක හමුදාව මගින් දෝණි 228 විශේෂ යාත්‍රාව නුදුරේදීම ශ්‍රී ලංකාවට හිමිවන බවත් මුහුදු මංකොල්ලකරුවන්, මෙරට සාගරය හරහා මත්ද්‍රව්‍ය ප්‍රවාහනය කිරීම, මිනිස් ජාවාරම්කරුවන් නිරීක්ෂණය ආදී සාගර කලාපයේ සිදුවන නීතිවිරෝධී ක්‍රියාවන් වැළැක්වීම සඳහා මැදිහත්වන බවත් ඒ මහතා කීවේය.                                                                                                                                           

ශ්‍රී ලංකා ගුවන් හමුදාව මෙරට ජාතික ආරක්ෂාව වෙනුවෙන්  සුවිශේෂී රාජකාරි රැසක් සිදු කරන බවද මෙම අධිතාක්ෂණ නවීන ගුවන් යානා සහ යාත්‍රා ලද පසුව එම ආවේක්ෂණ රාජකාරි තව තවත් නව තාක්ෂණය හා මුසුව සිදුකරන බවද ඒ මහතා වැඩිදුරටත් කීය.

(කේ.එල්. සුරවීර මහනුවර)