ලංකාව බොහෝ දේවල් වලින් අසමත් වෙමින් සිටි කාලයකදී ක්‍රිකට් ලොකු සමත් කමක් පෙන්වු විෂය ක්ෂේත්‍රයක් බට පත්ව තිබුණි.එය මිනිසුන්ට උදම් අනන්නට තිබූ එකම ක්ෂේත්‍රයද විය.

රටේ හැම දෙයක්ම දූෂිත වනවිට ක්‍රිකට් පමණක් පිරිසිදු තත්වය තිබිය නොහැකිය.අන්සියළු දේවල් සේම ක්‍රිකට්ද දූෂණයෙන් මුදාගැනීම අවශ්‍ය වුවත් එයට අත ගැසිය යුත්තේ ඉන් රටට ලැබෙන විදේශ ආදායම් පහළ දැමීමට හෝ අහිමි කිරීමට හේතු නොවන ආකාරටය.

ක්‍රිකට් ලංකාවට විදේශ විනිමය අදායම් උපයා දෙන වැදගත් මාර්ගයකි.2022 දී ලංකාව ක්‍රිකට් වලින් උපයන ලද ආදායම රුපියල් බිලියන 6.3 කි. 2024-27 වසර හතර තුළ අන්තර්ජාතික ක්‍රිකට් වලින් ලංකාව උපයන්නට අපේක්ෂිත වාර්ෂික ආදායම ඩොලර් මිලියන 27.12 ක් හෙවත් රුපියල් බිලියන 8.6 කි.

ලංකාව බංකොලොත් තත්ත්වයකට පත්ව ඒ තත්වයෙන් අත් මිදීමට දුෂ්කර උත්සහයක යෙදී සිටින රටකි.එවැනි තත්වයක් තුල අප එම අදායම පරදුවට තබා ක්‍රියාකරන තැනකට යායුතු නැත.ලංකාව ක්‍රිකට් සම්බන්ධයෙන් අනුගමනට කරමින් සිටින ප්‍රතිපත්ති ජාත්‍යන්තර ක්‍රිකට් කවුන්සලයේ ප්‍රතිපත්තිවලට පටහැනි වෙතොත් ජාත්‍යන්තර තරඟවලට තරඟ කිරීමේ අයිතිය අපට අහිමි කරන තත්වයක් ඇති විය හැකිය.

එසේම ක්‍රිකට් පිරිසිදු කිරීම සදහා පෙනී සිටින්නන් මෙම විවාදයේදී ඉන්දියාවට එරෙහිව එල්ල කරන චෝදනා ලංකාවට බරපතල ප්‍රශ්ණ ඇතිකරන තත්ත්වයක් ඇති කල හැකිය.

ජාත්‍යන්තර ක්‍රිකට් කවුන්සලයට වැඩිම ආදායමක් ලැබෙන්නේ ඉන්දියාවෙනි.අන්තර් ජාතික ක්‍රිකට් කවුන්සිලය අන්තර්ජාතික ක්‍රිකට්වල මිඩියා රයිට්ස් විකිනීමෙන් උපයාගන්නා ආදායමෙන් ලොකුම පංගුවක් ( 85%ක් පමණ) උපයා ගන්නේ ඉන්දියාවෙනි.

අනෙක් අතට මේ විවාදය ඉන්දීය විරෝධි විවාදයක් බවට පත් වී තිබෙන අතර එය රට කෙරෙහි ඇතිකරන ප්‍රතිඵලය ඉතා විනාශකාරි විය හැකිය.ක්‍රිකට් පාලක මණ්ඩලයට එරෙහිව කතාකරන ප්‍රධාන කථිකයින් කිහිපදෙනාගේ විවේචනයට භාජනය වී තිබෙන ප්‍රධාන පුද්ගලයා බවට පත්ව සිටින්නේ ඉන්දියානු ක්‍රිකට් පාලක මණ්ඩලයේ ප්‍රධානියා ලෙස ක්‍රියා කරන ජේ.ශා ය.( Jay Shah) ඔහු ඉන්දියාවේ අගැමැති මෝදීට පමණක් දෙවැනිවන ඉන්දියාවේ ස්වදේශ කටයුතු ඇමති Amit shah ගේ පුතාය.

මෝදිගේ අනුප්‍රාප්තිකයා වනු ඇත්තේ ඔහුය.ක්‍රිකට් පාලක මණ්ඩලය සමග ප්‍රශ්ණ තිබෙනවා නම් ජාත්‍යන්තර ක්‍රිකට් කවුන්සලය පවත්වාගෙන යන නීති රීති හා ප්‍රතිපත්තිවලට අනුකූලව එම ප්‍රශ්ණ විසඳා ගත යුතුය.එය රටට නැති ප්‍රශ්ණ ඇති කොට රට ලොකු පාඩු ලබන තත්වයකට තල්ලු කිරීමට ඉඩ නොදිය යුතුය.

ලංකාව බංකොලොත් තත්ත්වයට පත්වුවිට එම බිහිසුණු හා දුෂ්කර අවස්ථාවේ දී අපට නිර්ලෝභි ලෙස ආධර කළේ ඉන්දියාව බව අපි අමතක නොකල යුතුය.ඉන්දියාව අපේ ආසන්නම අසල්වැසියාය.කලාපීය බලවතා පමණක් නොව ලෝක බලවතකුගේ තත්ත්වයටද යමින් සිටින රටකි.ලංකාව ඉන්දියාවට යටහපහත් තත්වයකින් ජීවත් විය යුතු නැත.එහෙත් ලංකාව ඉන්දියාව සමග සහයෝගයෙන් වැඩ කරන මිතුරු තත්ත්වයක මිස සතුරු තත්ත්වයකට පත් විය යුතු නැත.