පසුගිය 22 වනදා මිතුරෙකු සමඟ, ආරාධනයකට අනුව වස්සාඋල්ල ප්රදේශයේ පුද්ගලයෙකුගේ නිවසට ගිය බව කියන තරුණයෙක් මේ වනවිට අතුරුදන්ව ඇති බව එම තරුණයාගේ සහෝදරයා පවසනවා.
මෙලෙස අතුරුදන්ව ඇත්තේ කුලියාපිටිය, කබලෑව ප්රදේශයේ පදිංචිව සිටි 36 හැවිරිදි සුසිත ජයවංශ නැමැති තරුණයෙක්.
අදාළ නිවසට ගිය අවස්ථාවේ සිට ඔහු පිළිබඳ කිසිඳු තොරතුරක් මේ දක්වා ලැබී නොමැති බවයි වාර්තා වෙන්නේ.
අතුරුදන්වීමට පෙර සුසිත ගිය බව පැවසෙන නිවසේ හිමිකරු වන සිඟිති නමැති පුද්ගලයාගෙන් සුසිතගේ මිතුරෙකුට දුරකථන ඇමතුමක්ද ලැබී තිබු අතර එම ඇමතුම සම්බන්ධයෙන් ඔහු මෙසේ පවසා තිබෙනවා.
“අඟහරුවාදා රෑ 7:58ට සිඟිති කියන කෙනා මට කෝල් එකක් ගත්තා. මං තාත්තා කෙනෙක් වශයෙන් මගේ දුවට සාධාරණයක් කෙරුවා කිව්වා. දැන් වැඩක් නැහැ ඒක කතා කරලා. ඌව මම මරලා ඉවරයි කිව්වා. ආයේ ඌට එන්න හම්බවෙන්නේ නැහැ කිව්වා.”
මෙම සිද්ධිය පිළිබඳව කුලියාපිටිය පොලීසිය විමර්ශන මෙහෙයවනවා.
