මුදල් සෙවීමේ අරමුණින් සිය 14 හැවිරිදි දියණියගේ නිරුවත් ඡායාරූපයක් ලබාදෙන ලෙස බිරිඳ කළ ඉල්ලීමකට ඇති වූ ආරවුලක් මත බිරිඳ විසින් කඩුවකින් පහර දී සැමියා ඝාතනය කර තිබෙනවා.

මෙම සිද්ධිය වාර්තා වන්නේ කුරුණෑගල, වැල්ලව ප්‍රදේශයෙන්.

මීට පෙර ද සැමියාගේ විසින් මෙම ඉල්ලීම සිදුකර තිබෙන අතර ඒ සම්බන්ධයෙන් බිරිඳ සහ ඔහු අතර නිරන්තරයෙන් ගැටුම් ඇතිව තිබෙන බව සඳහන්.

ඊයේ(03) දිනයේද එම පුද්ගලයා බිරිඳගෙන් සිය දියණියගේ ඡායාරූප ඉල්ලා බිරිඳ සමඟ බහින් බස් වී ඇති අතර, එය දුර දිග ගොස් බිරිඳට පහර දී තිබෙනවා.

එම අවස්ථාවේ දී බිරිඳ සැමියාට මිරිස් කුඩු ප්‍රහාරයක් එල්ල කර තිබෙන අතර පසුව ඇය විසින් නිවසේ තිබූ කඩුවකින් සැමියාගේ බෙල්ල ප්‍රදේශයට සහ කකුලකට පහර දී ඝාතනය කර තිබෙන බවයි අනාවරණය වන්නේ.

මෙලෙස ඝාතනයට ලක්ව ඇත්තේ 38 හැවිරිදි දෙදරු පියෙකි.

මෙම ඝාතනය සම්බන්ධයෙන් 36 හැවිරිදි මව වැල්ලව පොලිසිය විසින් අත්අඩංගුවට ගෙන තිබෙනවා.

සැකකාරිය අද (04) දිනයේදී කුරුණෑගල මහේස්ත්‍රාත් අධිකරණය වෙත ඉදිරිපත් කර තිබෙනවා.

සිද්ධිය සම්බන්ධයෙන් වැල්ලව පොලීසිය විසින් වැඩිදුර පරීක්ෂණ පවත්වනු ලබනවා.

අනුරාධපුර ගෙවල් 55 ප්‍රදේශයේ අද උදෑසන සිදුවූ රිය අනතුරකින් පුද්ගලයෙකු ජීවිතක්ෂයට පත්ව තිබෙනවා.

අද උදෑසන පාපැදිකරුවෙකු සිය පුහුණුවීම් කටයුතු සිදු කරමින් සිටින අතරතුර එම පාපැදිකරු හා මෝටර් රථයක් එකිනෙක ගැටීමෙන් මෙම අනතුර සිදුවී ඇති අතර බරපතල තුවාල ලැබූ පාපැදිකරු අනුරාධපුර ශික්ෂණ රෝහල වෙත ඇතුළත් කිරීමෙන් අනතුරුව මිය ගොස් තිබේ.

මෙසේ මියගොස් ඇත්තේ අනුරාධපුර, මලියදේවපුර පදිංචි 59 හැවිරිදි තිදරු පියෙකි.

සැකපිට මෝටර් රථයේ රියදුරු අත්අඩංගුවට ගෙන ඇති අතර අනුරාධපුර පොලිසියේ රථවාහන අංශය නිලධාරීන් වැඩිදුර පරීක්ෂණ සිදුකරයි.

(ඉන්දික රංගජිව – අනුරාධපුරය)

මහනුවර මහ නගර සභාව සතු වෙළෙඳ සංකීර්ණ 04 ක කඩ කාමර 18 ක බදු අයිතිය එක් බදුකරුවෙකු ගෙන් තවත් අයෙකුට පැවරීමේදී ගාස්තු වශයෙන් අය කළ රුපියල් එක්කෝටි තිස්පන්ලක්ෂ අසූතුන් දහසක මුදලක් නගර සභාවේ ගිණුමට බැර නොකර නගර සභාවේ ආදායම් අංශයේ කළමනාකරණ සහකාරවරියක විසින් වංචා කළ බව කියන සිද්ධියට අදාළව සිදු කෙරෙන පරීක්ෂණ අවසන් වනතෙක් කඩ කාමර මුද්‍රා  නොතබන ලෙස මධ්‍යම පළාත් ප්‍රධාන අමාත්‍යාංශ ලේකම් මේනක හේරත් මහතා නාගරික කොමසාරිස්වරයාට ලිඛිතව දැනුම් දී තිබේ.

කටුගස්තොට මැණික්කුඹුර සිල්ලර වෙළෙඳ සංකීර්ණයේ කඩ හිමියන් පිරිසක් මධ්‍යම පළාත් ආණ්ඩුකාර ලලිත් යූ ගමගේ මහතා හමුවී කළ ඉල්ලීමකට අනුව ආණ්ඩුකාරවරයාගේ දැනුම්දීම මත පළාත් ප්‍රධාන අමාත්‍යාංශ ලේකම්වරයා මෙම ලිපිය නාගරික කොමසාරිස් ඉෂාන් විජේතිලක මහතා වෙත යොමුකර ඇත.

කඩ කාමර පැවරීමේදී නගර සභාවේ නිලධාරීන් සිදුකර තිබෙන මූල්‍ය වංචාව හා අධීක්ෂණ රාජකාරි පැහැර හැරීම සම්බන්ධයෙන් සිදුවන පරීක්ෂණ අවසන් වනතෙක් කඩ කාමර මුද්‍රා නොතබන ලෙසත් අදාළ පරීක්ෂණ කඩිනමින් අවසන් කර වාර්තාව තමන් ලෙස බාරදෙන ලෙසත් ආණ්ඩුකාවරයා දැනුම් දී තිබෙන බව මේනක හේරත් මහතා කොමසාරිස්වරයාට යොමු කළ ලිපියේ සඳහන් වේ.                                                   

(කේ.එල්. සුරවීර මහනුවර)