මෙරට කුඩා තේ වතු වගාව මුළුමනින්ම විනාශවීමේ අවදානමක් සහිත කූට ජාවාරමක් පිළිබඳව මධ්‍යම පළාත් තේ ගොවීන් සුරැකීමේ සංවිධානය හෙළිදරව් කරයි.                                                                                    

මේ සූක්ෂ්ම ජාවාරම පිළිබඳව හෙළිදරව් කරන මධ්‍යම පළාත් තේ ගොවීන් සුරැකීමේ සංවිධානය සඳහන් කරන්නේ බලංගොඩ බල පෙදෙසේ තේ තවාන් වල තේ පැල වලට වටපණු රෝගය වැළඳීමේ ඉහළ සම්භාවිතාවක් පවතින බව තේ පර්යේෂණ ආයතනයේ පරීක්ෂණ මගින් තහවුරු කොට ඇති බැවින්  බලංගොඩ ප්‍රදේශයේ තේ පැල තවාන් වල තේ පැල බලංගොඩ ප්‍රදේශයෙන් පිට පළාත්වලට බෙදාහැරීම නීත්‍යානුකූල නොවන කටයුත්තක් වසයෙන් ශ්‍රී ලංකා තේ මණ්ඩලය තීරණය කොට ඇති බවය.

එමෙන්ම යටිනුවර ප්‍රදේශයේ දේශගුණය හා පාංශු තත්ත්ව ගුණාත්මකභාවය සලකා යටිනුවර තේ පැල ලංකාවේ ඕනෑම ප්‍රදේශයක සිටුවීමට කුඩා තේ වතු සංවර්ධන අධිකාරිය මෙන්ම ශ්‍රී ලංකා තේ මණ්ඩලය නිර්දේශ කොට තිබේ.     

කරුණු එසේ වුවද යටිනුවර ප්‍රදේශයේ පදිංචි ප්‍රබල ව්‍යාපාරිකයෙක්  තේ වගාවේ විනාශය පිළිබඳව කිසිදු සැලකිල්ලක් නොදක්වා ආර්ථික වාසිය පමණක්ම සැලකිල්ලට ගෙන බලංගොඩ ප්‍රදේශයෙන් අඩු ගුණාත්මකභාවයෙන් යුත් තේ පැල රුපියල් 20 ක් වැනි මුදලකට මිලදී ගෙන එම පැළ යටිනුවර ප්‍රදේශයේ තේ පැල බව පවසමින් රුපියල් 50 ක් වැනි ඉහල මිලකට මේ වන විට අලෙවි කරමින් සිටින බවද මධ්‍යම පළාතේ ගොවින් සුරැකීමේ සංවිධානය පවසයි.         

මෙම කූට ජාවාරම සිදු කරන ව්යාපාරිකයා විසින් දකුණු පළාතේ ගාල්ල දිස්ත්‍රික්කයට යටිනුවර ප්‍රදේශයේ තේ පැල ලක්ෂ 05 ක් ලබාදීම සඳහා ඇනවුමක් ලබාගෙන ඇති බවත් එම ඇනවුම්  කොන්දේසි අමු අමුවේ උල්ලංඝනය කරමින් යටිනුවර ප්‍රදේශයේ තේ පැල වෙනුවට බලංගොඩ ප්‍රදේශයේ ගුණාත්මකභාවයෙන් අඩු තේ පැල විශාල ප්‍රමාණයක් මේ වන විටද ගාල්ල ප්‍රදේශයට යවා ඇති බවද තවත් තේ පැල ලක්ෂ ගණනාවක් යැවීම සඳහා සූදානම් කොට ඇති බවද මධ්‍යම පළාත් තේ ගොවීන් සුරැකීමේ සංවිධානයේ සභාපති දඹගොඩ සෙනෙවිරත්න පවසයි.      

මේ හේතුවෙන් වටපණු රෝගය පැතිරගොස් දකුණු පළාතේ කුඩා තේ වතු සම්පූර්ණ විනාශවීමේ අවදානමක් අනිවාර්යයෙන්ම උද්ගතවන බව හෙතෙම කියයි.       

මෙම කූට ජාවාරම පිළිබඳව මුදල් රාජ්‍ය අමාත්‍ය රංජිත් සියඹලාපිටිය, ශ්‍රී ලංකා තේ මණ්ඩලයේ සභාපති විරාජ් ද මෙල්, ගාල්ල දිස්ත්‍රික් පාර්ලිමේන්තු මන්ත්‍රී ගයන්ත කරුණාතිලක, කුඩා තේ වතු සංවර්ධන අධිකාරිය ඇතුළු ආයතන ගණනාවකටම ලිඛිතව පැමිණිලි කොට ඇති බව හෙතෙම වැඩි දුරටත් පවසයි.

මේ පිළිබඳව කඩිනම් අවධානය යොමුකොට අදාල පුද්ගලයන් හට නීතිමය ක්‍රියාමාර්ග ගන්නා ලෙසද මධ්‍යම පළාතේ ගොවින් සුරැකීමේ සංවිධානය අදාළ බලධාරීන්ගෙන් ඉල්ලා සිටී.

(කේ.එල්. සුරවීර මහනුවර )