විදුලි පාරිභෝගිකයන් ලක්ෂ 50කට රතු බිල් යැවීම සම්බන්ධයෙන් පළවූ මාධ්‍ය වාර්තා සම්බන්ධයෙන් ලංකා විදුලිබල මණ්ඩලය විශේෂ නිවේදනයක් නිකුත් කර තිබෙනවා.
විදුලිය පාරිභෝජනය කර මාසයක් ඉක්මගිය පසු විදුලි බිල ගෙවිය යුතු අතර බහුතර පාරිභෝගිකයන් සංඛ්‍යාවක් නියමිත වේලාවට විදුලි බිල්පත් ගෙවනු ලබන බව ලංකා විදුලිබල මණ්ඩලය පවසනවා.
ඒ අනුව සාමාන්‍යයෙන් රතු බිලක් ලබා දෙන්නේ මාසයක් ගතවු පසුව බවත් ඊට අමතරව රතු බිල්පත් නිකුත් කර තවත් දින 10ක සහන කාලයක් ලබාදීමෙන් අනතුරුව විදුලිය විසන්ධි කිරීම සිදුකරන බවයි එම මණ්ඩලය සඳහන් කරන්නේ.
විදුලිය විසන්ධි කළ පිරිස සහ යළි සම්බන්ධතාව ලබාදුන් පිරිස සම්බන්ධයෙන් විස්තරාත්මක වාර්තාවක්ද විදුලි බල මණ්ඩලය නිකුත් කර තිබෙනවා.
එම වාර්තාව අනුව 2019 වසරේ 573,073ක් විදුලිය විසන්ධිකර නැවත සම්බන්ධ කර ඇති බවත් 2023 වසරේ ඔක්තෝබර් මාසය දක්වා 544,488 කගේ විදුලිය විසන්ධි කර යළි සබඳතා ලබාදී ඇති බවද සඳහන්.
2020 සහ 2021 කොවිඩ් වසංගත තත්ත්වය හේතුවෙන් එම අගය අඩු වූ බවත් 2022 විදුලි කප්පාදුව හේතුවෙන් විසන්ධි කිරීම් සීමා වූ බවත් විදුලිබල මණ්ඩලය දැනුම් දෙයි.
