ලෝකයේ තරගකාරී ආර්ථිකය සමඟ ඉදිරියට යාමට ශ්‍රී ලංකාව සූදානම් කිරීම වෙනුවෙන් ඩිජිටල් පරිවර්තනය වේගවත් කළ යුතු බව ජනාධිපති රනිල් වික්‍රමසිංහ මහතා අවධාරණය කළේය.
ඒ සඳහා වූ සැලැස්ම ඉදිරි අයවැය කථාවේ දී රටට ඉදිරිපත් කරන බවත්, එම වැඩපිළිවෙළ ඉදිරියට ක්‍රියාත්මක කිරීම වෙනුවෙන් අවශ්‍ය නීති ගෙන ඒමටද බලාපොරොත්තුවන බවත් ජනාධිපතිවරයා පැවසීය.
ජනාධිපති රනිල් වික්‍රමසිංහ මහතා මේ බව සඳහන් කළේ ඊයේ (25) පස්වරුවේ කොළඹ මොනාක් ඉම්පීරියල් හෝටලයේ පැවති “ජාතික තොරතුරු තාක්ෂණ සම්මාන උළෙල – NBQSA 2023” අමතමිනි.
දේශීයව පුද්ගලයින්ගේ සහ සංවිධානවල කැපී පෙනෙන තොරතුරු සන්නිවේදන තාක්ෂණ නිෂ්පාදන සහ නවෝත්පාදන සඳහා ඉහළ පිළිගැනීමක් ලබා දීම මෙන්ම ඔවුන්ගේ තොරතුරු හා සන්නිවේදන තාක්ෂණ නිෂ්පාදන සහ සේවා සඳහා අන්තර්ජාතික තලයකදී තරඟ කිරීමට වේදිකාවක් නිර්මාණය කර දෙමින් තොරතුරු තාක්ෂණ වරලත් ආයතනය වන බ්‍රිතාන්‍ය පරිගණක සංගමයේ ශ්‍රි ලංකා අංශය විසින් වාර්ෂිකව මෙම සම්මාන උළෙල සංවිධානය කරනු ලබයි.
තොරතුරු තාක්ෂණ සේවා අංශයේ විශිෂ්ටතා දැක්වූ තොරතුරු තාක්ෂණ ආයතන කිහිපයක් වෙනුවෙන් සම්මාන පිරිනැමීම ද මෙහිදී ජනාධිපති රනිල් වික්‍රමසිංහ මහතා අතින් සිදු විය.
බ්‍රිතාන්‍ය පරිගණක සංගමයේ, ශ්‍රි ලංකා අංශයේ සභාපති ඇලන්සෝ ඩෝල් (Alanzo Doll) මහතා විසින් ජනාධිපතිවරයා වෙත සමරු තිළිණයක් පිළිගැන්වූ අතර ජනාධිපති රනිල් වික්‍රමසිංහ මහතා එහි නිලධාරී මණ්ඩලය සමග සමූහ ඡායාරූපයකට ද පෙනී සිටියේය.
අනතුරුව සම්මානලාභී සියලු දෙනා සමඟ ද ජනාධිපතිවරයා සමූහ ඡායාරූපයකට එක්විය.
