යතුරුපැදියකින් පැමිණි නාඳුනන පුද්ගලයන් දෙදෙනෙකු විසින් පදවිය, බෝගහවැව ප්රදේශයේදී පෙරේදා (05) රාත්රියේ නිවසක සිටි 73 හැවිරිදි කාන්තාවක් වෙඩිතබා ඝාතනය කිරීම වැරදීමකින් සිදු වූවක් බව පොලීසිය පවසනවා.
ඝාතනයට පැමිණි සැකකරුවන් දෙදෙනා පුල්මුඩේ කඳවුරට අනියුක්ත පොලිස් විශේෂ කාර්ය බලකායේ නිලධාරීන් විසින් අත්අඩංගුවට ගැනීමෙන් පසු සිදුකළ විමර්ශනවලදී මෙම කරුණු අනාවරණය වී තිබෙනවා.
සැකකරුවන් දෙදෙනා ඩුබායි රාජ්යයේ සැගව සිටින සංවිධානාත්මක අපරාධකරුවෙකු වන වැලිඔය ප්රියන්තගේ ගෝලයන් දෙදෙනෙකු බව සඳහන්.
ඔවුන් කිරිඉබ්බන්වැව, වැලිඔය ප්රදේශයේදී අත්අඩංගුවට පත්ව තිබෙනවා.
එහිදී මෙම ඝාතනය ඇතුළු මනුෂ්ය ඝාතන 3ක් සදහා භාවිතා කළ T56 ගිනි අවිය හා එහි පතුරම් ගැබ සහ උණ්ඩ 08ක්, විදේශීය නිෂ්පාදිත රිවෝල්වරයක් හා එහි උණ්ඩ 04ක්, අයිස් මත්ද්රව්ය ග්රෑම් 61 සහ හෙරොයින් ග්රෑම් 105ක් විශේෂ කාර්ය බලකා නිලධාරින් සිය භාරයට ගෙන තිබුණා.
කෙසේ වෙතත් අත්අඩංගුවට පත් සැකකරුවන් දෙදෙනාට බෝගහවැව ප්රදේශයට පැමිණ ඇත්තේ එම නිවසේ සිටින මත්ද්රව්ය ජාවාරමකට සම්බන්ධ වූ ඝාතනයට ලක් වූ කාන්තාවගේ මිණිබිරියට වෙඩි තැබීමට බව විමර්ශනවලදී හෙළිවී තිබෙනවා.
