පාර්ලිමේන්තුව අද (17) පෙ.ව 9.30ට රැස්වීමට නියමිතයි.
පාර්ලිමේන්තුව රැස්වීමෙන් අනතුරුව, අද (17) පළමුව අභිනව මන්ත්රීවරුන් දිවුරුම් දීමට නියමිත බවත් අනතුරුව නව කථානායකවරයා තෝරා පත්කර ගැනීම සිදුවන බවත් පාර්ලිමේන්තුවේ මහලේකම් කුෂානි රෝහණදීර මහත්මිය පවසනවා.
ඊයේ (16) පාර්ලිමේන්තුවේදී නියෝජ්ය කථානායක වෛද්ය රිස්වි සාලි මහතාගේ ප්රධානත්වයෙන් පාර්ලිමේන්තු කටයුතු පිළිබඳ කාරක සභාව රැස්වූ අවස්ථාවේදී මේ බව සාකච්ඡා වී තිබෙනවා.
අද (17) පෙ.ව 9.30 සිට පෙ.ව 9.45 දක්වා නව මන්ත්රීවරයන්ගේ නිල ප්රතිඥාව, දිවුරුම ලබා දීම සඳහා කාලය වෙන්කර තිබෙනවා.
සමගි ජනබලවේගයේ ජාතික ලැයිස්තුවෙන් නම්කළ මන්ත්රීවරයන් තිදෙනෙකු සහ නව ප්රජාතන්ත්රවාදී පෙරමුණේ ජාතික ලැයිස්තුවෙන් නම් කළ මන්ත්රීවරයෙකු මෙසේ දිවුරුම් දීමට නියමිතයි.
ඉන්අනතුරුව නව කථානායකවරයෙකු තෝරා ගැනීමට නියමිතයි.
ඉන්පසු වාචික පිළිතුරු අපේක්ෂා කරන ප්රශ්න සඳහා මන්ත්රීවරයන්ට අවස්ථාව සලසා තිබෙනවා.
අනතුරුව පාසල් ළමුන්ට ලිපිද්රව්ය ලබාගැනීම පිණිස දීමනාවක් ලබාදීම සඳහාවූ පරිපූරක ඇස්තමේන්තුව පෙ.ව. 11.00 සිට ප.ව. 3.00 දක්වා විවාදයට ගෙන එම විවාදය හෙට (18) දිනට ද පැවැත්වීමට තීරණය කර තිබෙනවා.
මේ අනුව පෙර තීරණය කළ පරිදි 2024 මාර්ග ව්යාපෘති සඳහා ප්රතිපාදන වෙන්කිරීම වෙනුවෙන් වූ පරිපූරක ඇස්තමේන්තුව මෙදින විවාදයට ගැනීම සිදු නොවන බව සඳහන්.
ඉන්පසු ප.ව. 3.00 සිට ප.ව. 6.30 දක්වා ජාත්යන්තර ස්වෛරී බැඳුම්කර ප්රතිව්යුහගත කිරීම පිළිබඳව විරුද්ධ පාර්ශ්වයේ නායකවරයා විසින් ගෙන එනු ලබන සභාව කල් තබන අවස්ථාවේ යෝජනාව විවාදයට ගැනීමට නියමිතයි.
නව කථානායකවරයෙකු තෝරාපත්කර ගැනීමට කාලය වෙන් කිරීම හේතුවෙන් විවාද කාලය මෙසේ පැයකින් දීර්ඝ කිරීමට තීරණය වී තිබෙනවා.
