දිවා ආහාර ලබා දීමේ වැඩපිළිවෙළ ක්‍රියාත්මක කිරීමත් සමඟ ප්‍රාථමික පාසල්වල සහ සිසුන් 100ට අඩු පාසල්වල සිසුන් පාසලට පැමිණීමේ වර්ධනයක් සිදුව ඇති බව ක්‍රම හා විධි පිළිබඳ පාර්ලිමේන්තු කාරක සභාවේදී අනාවරණය වී තිබේ.
පසුගිය සමයෙහිදී පාසල් සිසුන් ලක්ෂ හයක පිරිසක් උදෑසන ආහාර වේල නොගෙන පාසල් පැමිණෙන බව වාර්තා වූ බවත් මෙම ආහාර ලබා දීමේ වැඩපිළිවෙළ ක්‍රියාත්මක කිරීමෙන් අනතුරුව දරුවන්ගේ පාසල් පැමිණීම වැඩි වී ඇති බවට ද කාරක සභාවේදී අනාවරණය වී ඇත.
ඒ අනුව දිවා ආහාර ලබා දීමේ වැඩපිළිවෙළ සමඟ ප්‍රාථමික පාසල්වල සහ සිසුන් 100ට අඩු පාසල්වල සිසුන් පාසලට පැමිණීමේ වර්ධනයක් සිදුව ඇත්දැයි සොයා බලා වාර්තාවක් හා දිවා ආහාර ලබා දෙන සිසුන් සංඛ්‍යාවන් පිළිබඳ වාර්තාවක් කාරක සභාව වෙත ලබාදෙන ලෙසද කාරක සභාවේ සභාපති, පාර්ලිමේන්තු මන්ත්‍රී පාඨලී චම්පික රණවක මහතා අධ්‍යාපන අමාත්‍යාංශයට උපදෙස් දී ඇත. මෙම වැඩසටහනේ සමස්ත ප්‍රගතිය පිළිබඳ වාර්තාවක්ද ලබා දෙන ලෙස කාරක සභා සභාපතිවරයා අධ්‍යාපන අමාත්‍යාංශයට උපදෙස් දී ඇත.
ක්‍රම සහ විධි පිළිබඳ පාර්ලිමේන්තු කාරක සභාව එහි සභාපති පාඨලී චම්පික රණවක මහතාගේ ප්‍රධානත්වයෙන් පසුගියදා පාර්ලිමේන්තු සංකීර්ණයේදී රැස්වූ අතර එහිදී මෙම උපදෙස් දී ඇත.
පාසල් ළමයින්ට ලබාදෙන දිවා ආහාර වේල සම්බන්ධ අවධානය යොමු කළ ක්‍රම සහ විධි පිළිබඳ කාරක සභාවේදී අනාවරණය වූයේ රජයේ පාසල්වල ප්‍රාථමික ශ්‍රේණිවල දරුවන් සඳහා ආහාර ලබා දීම 2024 වසරේදී ලක්ෂ 11 සිට ලක්ෂ 16 දක්වා ඉහළ ගොස් ඇති බවයි. ඒ අනුව එක් දරුවකු සඳහා මෙහිදී වෙන් කෙරෙන මුදල රුපියල් 80 සිට රුපියල් 110ක් දක්වා වැඩි කර තිබේ.
පාසල් ළමයින්ට ලබාදෙන ආහාර වේල සඳහා වසරකට රුපියල් බිලියන 16.6ක් වැය වන නමුත් තවත් රුපියල් බිලියන 4ක පමණ අඩුවක් පවතින බව ද ප්‍රකාශ විය. පාසල් සිසුන්ට ආහාර වේලක් ලබාදීමේ වැඩපිළිවෙළ සඳහා ආධාර ලබාදීමට විදෙස්ගත ශ්‍රී ලාංකිකයන් විශාල කැමැත්තකින් පසුවන නමුත් ඍජුව රජය වෙත මෙම ආධාර ලබාදීමට ඔවුන් නොකැමැත්තක් දක්වන බව සභාපතිවරයා මෙහිදී පැවසීය. ගුරුදෙගුරු සමිති, පාසල් සංවර්ධන සමිති වැනි පාර්ශ්වයක් වෙත එම ආධාර ලබාදීම සඳහා නීතිමය බාධාවක් තිබේද යන්න සොයා බලන ලෙස ද හෙතෙම උපදෙස් දුන්නේය. එසේම සමාජ මාධ්‍යය පාදක කරගෙන පැමිණිලි භාර ගැනීම සඳහා ක්‍රමවේදයක් සකස් කරන ලෙස උපදෙස් දුන් සභාපතිවරයා වට්ස්ඇප් මඟින් ලබා දෙන ආහාර වේලේ ප්‍රමිතිය පිළිබඳ නිතිපතා වාර්තා කිරීම වැනි ක්‍රමවේදයක් භාවිත කරන ලෙස ද ප්‍රකාශ කළේය.
