මහනුවර ගුඩ්ෂෙඩ් බස් නැවතුම් පර්යන්තය ඉදිකිරීමේ ව්‍යාපෘතියේදී මහනුවර නගරයට ජලය බෙදා හරින අභ්‍යන්තර ජලනල පද්ධතියට සිදුවූ හානියක් හේතුවෙන් අද (30) අලුයම 2.00 දක්වා මහනුවර නගර සීමාවේ ප්‍රදේශ කිහිපයකට ජල සැපයීම තාවකාලිකව අත්හිටුවීමට සිදුවන බව ජල සම්පාදන මණ්ඩලය පවසනවා.
මහනුවර නගරයේ පේරාදෙණිය පාර, විලියම් ගොපල්ලව මාවත, උසාවි සංකීර්ණය අසල සිට නගර සභා හන්දිය දක්වා, අස්ගිරිය, වැව රවුම, රජ පිහිල්ල මාවත, බුවැලිකඩ, තැන්නේකුඹුර, ගුරුදෙනිය, අම්පිටිය සහ මහනුවර නගර මධ්‍යයේ සියලුම වීදි ආශ්‍රිත ප්‍රදේශවලට එලෙස ජල සැපයුමට බාධා පැමිණ ඇති බව නිවේදනය කළා.
ජල සම්පාදන මණ්ඩලය සඳහන් කළේ, බිඳවැටුණ ජල නල පද්ධතිය මේ වන විට ප්‍රතිසංස්කරණය කරමින් පවතින බවයි.
ජල සැපයුම අත්හිටුවන කාලය තුළ අවශ්‍ය ජලය ගබඩා කර ගැනීමටත් විකල්ප ජල ප්‍රවාහයන් භාවිතා කරන ලෙසත් ජල සම්පාදන මණ්ඩලය ජනතාවගෙන් ඉල්ලා සිටිනවා.
