චීන කොමියුනිස්ට් පක්ෂයේ ආරාධනයක් මත මේ දිනවල චීනයේ සංචාරයක නිතර ජනතා
විමුක්ති පෙරමුණේ ප්‍රධාන ලේකම් ටිල්වින් සිල්වා ඇතුලු පිරිස චීන කොමියුනිස්ට් පක්ෂයේ
විදේශ කටයුතු දෙපාර්තමේන්තුවේ මූලස්ථානයේදී චීනයේ විදේශ ඇමති ලියූ ජින්තාවෝ ඇතුළු
ඉහළ පෙළේ නායකයින් අතර සාකච්ඡාවක් පවත්වා තිබෙනවා.
ජනතා විමුක්ති පෙරමුණත් චීන කොමියුනිස්ට් පක්ෂයත් අතර පවතින දීර්ඝකාලීන මිත්‍රත්වය
කිසිවෙකුටත් පලුදු කළ නොහැකි බවත් එම මිත්‍රත්වය පලුදු කිරීමට කිසිවෙකුටත් ඉඩ නොදෙන
බවත් චීනයේ විදේශ ඇමති ලියූ ජින්තාවෝ එහිදී අවධාරණය කළා.
රට සංවර්ධනය කිරීමේ වැඩපිළිවෙළට අවශ්‍ය ඕනෑම විටෙක සහාය ලබාදීමට චීනය සූදානම්
බවත් කිසිදු රටක ස්වෛරීභාවයට හානි වන අකාරයේ ක්‍රියාමාර්ගවලට චීනය සූදානම් නැති
බවද විදේශ ඇමති ලියූ ජින්තාවෝ සඳහන් කර සිටියා.
එහිදී ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා සහෝදරයා සඳහන් කර සිටියේ
චීනය සහ ලංකාව අතරත් ජනතා විමුක්ති පෙරමුණ සහ චීන කොමියුනිස්ට් පක්ෂය අතරත්
පවතින මිත්‍රත්වය මෙම වසරේ මුල ජනතා විමුක්ති පෙරමුණේ නායක, ජනාධිපති අනුර කුමාර
දිසානායක සහෝදරයාගේ සංචාරයේදී තව දුරටත් වර්ධනය වූ බවය. එමෙන්ම තමන් ඇතුළු
පිරිස සිදු කරන මෙම සංචාරයේදී එම මිත්‍රත්වය තවදුරටත් වර්ධනය වන බවත් ඔහු අවධාරණය
කළා.
එමෙන්ම චීනය සහ ශ්‍රී ලංකාව අතර එළැඹි අවබෝධයන් අනුව කටයුතු කරන බවත් චීනය ශ්‍රී
ලංකාවට ලබාදෙන සහායට ස්තුති වන්ත වන බවත් ඉදිරියටත් එම සහාය බලාපොරොත්තු වන
බවත් මෙහිදී සඳහන් කර තිබෙනවා.
චීන තුළ සිදු කළ මෙම සංචාරයේදී චීනය ගොඩ නැගීමට සභාපති මාඕ සේතුං හිටපු නායකයාගේ
සිට ෂී ජින් පිං දක්වා චීනය කටයුතු කරමින් සිටින ආකාරය පිළිබඳව සතුටු වන බවත් චීනය තමන්ට
ආවේනික ලෙස මාක්ස්වාදය ඉදිරියට ගෙන යමින් තිබීම චීන කොමියුනිස්ට් පක්ෂය ලද ජයග්‍රහණයක්
බවත් සඳහන් කළා.
මෙම සංචාරයේදී පක්ෂ පාසල් තුළින් සහ ගම්මාන ගොඩ නැගීමට කටයුතු කර ඇති ආකාරය
සම්බන්ධයෙන් කළ අධ්‍යයන තුළින් ලද අත්දැකීම් ශ්‍රී ලංකාවේ ඉදිරි සංවර්ධනයට බෙහෙවින් දායක
කර ගත හැකි බවද ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා අවධාරණය කර සිටියා.
මෙම හමුව සඳහා චීනයේ නියෝජ්‍ය විදේශ ඇමති සුන් හැයියාන් ඇතුළු චීන කොමියුනිස්ට් පක්ෂයේ
විදේශ කටයුතු දෙපාර්තමේන්තුවේ පිරිසක්ද එක් වී සිටියා.
