චීන කොමියුනිස්ට් පක්ෂයේ ආරාධනයක් මත මේ දිනවල චීනයේ සංචාරයක නිතර ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා ඇතුලු පිරිස ඊයේ දින (18) පස්වරුවේ බීජිං නගරයේ ප්‍රධාන මහජන ශාලාවේදී චීන කොමියුනිස්ට් පක්ෂයේ දේශපාලන මණ්ඩල සාමාජික, ස්ථාවර කමිටු සාමාජික සහ චීන කොමියුනිස්ට් පක්ෂයේ සංවිධාන අංශයේ ප්‍රධානී ෂී තැයිෆෙන් ඇතුළු ඉහළ පෙළේ නායකයින් පිරිසක් හමුව තිබෙනවා.
එහිදී ජනතා විමුක්ති පෙරමුණත් චීන කොමියුනිස්ට් පක්ෂයත් අතර පවතින දීර්ඝකාලීන මිත්‍රත්වය පිළිබඳව සිහිපත් කළ ෂී තැයිෆෙන්, පක්ෂයේ කාඩර්වරුන්ගේ දේශපාලන න්‍යායික දැනුම නිරන්තරයෙන් වර්ධනය කිරීමේ ඇති වැදගත්කම පෙන්වා දෙමින් චීනය අවශ්‍ය ඕනෑම මොහොතක තම අත්දැකීම් ජනතා විමුක්ති පෙරමුණ සමග බෙදා ගැනීමට සූදානම් බවයි සඳහන් කර ඇත්තේ.
ශ්‍රී ලංකාවේ ආර්ථික සංවර්ධන වැඩසටහන අනුව අවශ්‍ය සහය ලබා දීමට සූදානම් බවත් ඒ සඳහා වූ එකඟතාවයන් කිහිපයක් මෙම වසරේ මුල් කාලයේ චීනයට පැමිණි ජනාධිපති අනුර කුමාර දිසානායක සමග ඇති කරගත් බවත් ඔහු වැඩිදුරටත් සඳහන් කර තිබේ.
එහිදී ටිල්වින් සිල්වා සඳහන් කර තිබුණේ චීනය සහ ලංකාව අතරත් ජනතා විමුක්ති පෙරමුණ සහ චීන කොමියුනිස්ට් පක්ෂය අතරත් පවතින මිත්‍රත්වය මෙම සංචාරයේදී තවදුරටත් වර්ධනය වූ බවයි.
එමෙන්ම චීනයේ ජජියාන් ප්‍රාන්තයේ සහ ගුයිෂූ ප්‍රාන්තයේ ගම්මානවල සිදු කළ සංචාරයේදී එම ගම්මාන දියුණු කිරීමට ගෙන ඇති ක්‍රියාමාර්ග පිළිබඳව මනා අවබෝදයක් ඇති කර ගැනීමට හැකි වූ බවත් ශ්‍රී ලංකාව සංවර්ධනය කිරීමේ වැඩපිළිවෙළ සාර්ථක කර ගැනීමට එම ලද අත්දැකීම් ඉවහල් වනු ඇති බවත් ප්‍රධාන ලේකම්වරයා අවධාරණය කර තිබේ.
රබර් – සහල් ගිවිසුමේ සිට විවිධ ක්‍රම හරහා චීනය, ශ්‍රී ලංකාවට උදව් කරමින් සිටින බවත් වර්ථමානයේද ශ්‍රී ලාංකික පාසල් දරුවන්ගේ නිල ඇඳුම් සඳහා රෙදි ලබාදීම ඉතාමත් අගයකොට අදහස් දක්වමින් ටිල්වින් සිල්වා, 2026 වසරේ ද එම නිල ඇඳුම් රෙදි ලංකංවේ පාසල් වෙත හිමිවනු ඇතැයි අපේක්ෂා කරන බවත් සඳහන් කර ඇත.
මෙම හමුව සඳහා චීන කොමියුනිස්ට් පක්ෂයේ ජාත්‍යන්තර අංශයේ නියෝජ්‍ය ඇමති සුන් හැයියාන් ඇතුළු චීන කොමියුනිස්ට් පක්ෂයේ ඉහළ පෙළේ නිලධාරීන් පිරිසක් ද ජනතා විමුක්ති පෙරමුණ නියෝජනය කරමින් තරුණ කටයුතු නියෝජ්‍ය ඇමති එරංග ගුණසේකර, ජාතික ඒකාබද්ධතා නියොජ්‍ය ඇමති මුනීර් මුලෆ්ෆර්, යාපනය දිස්ත්‍රික් පාර්ලිමේන්තු මන්ත්‍රී ඒ. එම් ජෙගදීශ්වරන්, මාතලේ දිස්ත්‍රික් පාර්ලිමේන්තු මන්ත්‍රීනි දීප්ති වාසලගේ, ගම්පහ දිස්ත්‍ර්ක් පාර්ලිමේන්තු මන්ත්‍රී ධර්මප්‍රිය විජේසිංහ ඇතුළු පිරිසක් එක්ව සිටියා.
