වසර 12ක් තිස්සේ පැවති නඩුවකින්, "චිලී" වැරදිකරු වෙයි

ප්‍රසිද්ධ ගායන ශිල්පියෙකු වන තිලංක විදූෂ නොහොත් "චිලී" යන අයගේ නිවසට ඩෙංගු පරීක්ෂාවට පැමිණි පොලිස් නිළධාරීන්ට සාපරාධි බලහත්කාරය පෑම සහ පහර දීමට තැත් කිරීම සම්බන්ධයෙන් විභාග වූ නඩුවකින් සැකකරු වැරදිකරු ලෙසට කඩුවෙල මහෙස්ත්‍රාත් අරුණ ඉන්ද්‍රජිත් බුද්ධදාස මහතා අද (20) දින නියෝග කළා.

මේ සම්බන්ධයෙන් වූ දඩුවම් නියම කිරීම ලබන ජූලි මස 22 දින තීරණය කිරීමටත් මෙහිදී මහේස්ත්‍රාත්වරයා නියෝග කරනු ලැබුවා.

2014 වසරේදී තලංගම පොලිස් බල ප්‍රදේශයේ පිහිටි 'චිලී' නොහොත් වෙළදගොඩ පතිරණගේ තිලංක විදූෂ යන අය පදිංචිව සිටි නිවසේ ඩෙංගු පරීක්ෂා කිරීම සඳහා තලංගම පොලිසියේ පොලිස් නිළධාරීන් පැමිණි අවස්ථාවේදී මෙලෙස එම නිළධාරීන්ට සාපරාධී බලහත්කාරය පෑම සහ පහරදීමට තැත් කිරීම සිදු කිරීම සම්බන්ධයෙන් අත්අඩංගුවට ගැනුන සැකකරු රක්ෂිත බන්ධනාගාර ගත කිරීමෙන් පසු ඇප මත නිදහස් කෙරුණා.

ඒ අනුව වසර 12ක කාලයක් මේ සම්බන්ධයෙන් කඩුවෙල මහෙස්ත්‍රාත් අධිකරණයෙහි නඩු විභාගය සිදු විය.