ප්‍රධාන දේශපාලන පක්ෂයක කළුතර කාර්යාලය පවත්වාගෙන ගිය නිවසේ භූගත බංකරයක් සකස්කර කසිප්පු ස්කාගාරයක් පවත්වාගෙන ගිය එම පක්ෂයේ කළුතර ප්‍රාදේශීය සභා අපේක්ෂකයෙකු අත්අඩංගුවට ගැනීමට කළුතර උතුර පොලිසිය සමත්ව ඇත .
මහ වස්කඩුව ප්‍රදේශයේ පදිංචි 42 හැව්රිදි පුද්ගලයකු මෙසේ අත්අඩංගුවට ගෙන ඇති බවත්, ඔහු එම පක්ෂයෙන්ම කොට්ඨාස අපේක්ෂක ලෙසින් නාමයෝජනා භාරදී ඇති බවත් පොලිසිය කීය.
කළුතර ප්‍රධාන පාසලක් ආසන්නයේ ගාලුපාරට මුහුනලා පිහිටි නිවස රුපියල් 30,000 කට මාසික කුලියට ලබාගෙන ත්‍රීරෝද යතුරුපැදි අළුත්වැඩියා කිරීම සහ පින්තාරු කිරිම ඇතුළු සේවාවන් සිදුකරන මුවාවෙන් ජාවාරම කරගෙන ගොස් ඇති බවද පොලිසිය කීය.
පොලිසියට සැකසිතී පරීක්ෂා කිරීමට පැමිණීමේදී ඉබි යතුරු දමා තිබූ දොරවල් කඩා පරීක්ෂා කිරීමේදී කාමරයක් තුල භුගත බංකරක්ද සකස්කොට නවීන ක්‍රමයට පවත්වාගෙන ගිය කාමරයේ තිබී ගෝඩා මිලිලීටර් ලක්ෂ විස්සකට ආසන්න ප්‍රමාණයක් අඩංගු බැරල් 10 ක්, ප්ලාස්ටික් කෑන් 05 ක්, දගර , ගෑස් ටැංකි ඇතුළු පෙරීමේ උපකරණ පොලිස් භාරයට ගෙන තිබේ .
පිටතට ගද නොඑන ආකාරයට කාමරයේ සිමෙන්ති පොලව කඩා ඇතුල්කල බටයකින් නිවසින් පිටත පිහිටි වැසිකිලි වලකට යොමු කර ඇති බවද නිරීක්ෂණය වූ බව පොලිසිය කීය.
මෙම ස්ථානය නිෂ්පාදනය කරන මත්පැන් කළුතර, පොතුපිටිය ,ගල්පාත, වාද්දුව ප්‍රදේශවලට තොග වශයෙන් බෙදා හැර ඇති බවටද තොරතුරු අනාවරණය වී ඇත.
සැකකරු කළුතර මහේස්ත්‍රාත් අධ්කරණයට ඉදිරිපත් කිරීමට නියමිතව තිබූණි .
ජේෂ්ඨ පොලිස් අධිකාරී ප්‍රසන්න බ්‍රාහ්මණගේ , සහකාර පොලිස් අධිකාරී සුනෙත් ශාන්ත යන මහත්වරුන්ගේ උපදෙස් පරිදි ස්ථානාධිපති ප්‍රධාන පොලිස් පරීක්ෂක දමිත් ජයතිලක මහතාගේ මෙහෙයවීමෙන් අපරාධ අංශ ස්ථානාධිපති පොලිස් පරීක්ෂක කපිල ලක්සිත මහතාගේ ප්‍රධානත්වයෙන් කොස්තාපල් වරුන්වන තිලකරත්න (94014), අජිත් (88148), ප්‍රසාද් (27731), ජයවර්ධන (102938), මධුවන්ත (104672) සහ ඩිලයි ( 103405 ) වැටලීමට එක්වූහ .
(කළුතර සම්පත් කුලරත්න)
