නෙස්ලේ ලංකා පොල් වගා මණ්ඩලය සමඟ එක් වෙමින් සිය පොල් සංවර්ධන සැලසුම හරහා පොල් වටිනාකම් දාමයේ පුනර්ජනනීය කෘෂිකාර්මික භාවිතයන් ප්‍රවර්ධනය කිරීම පියවර ගනියි

නෙස්ලේ සමාගම සිය ‘නෙස්ලේ පොල් සංවර්ධන සැලසුමෙහි’ තවත් පියවරක් ලෙස ශ්‍රී ලංකා පොල් වගා මණ්ඩලය සමඟ එක් වෙමින් පොල් ගොවීන් සඳහා දින දෙකක පුහුණු වැඩසටහනක් පැවත්වීමට පසුගියදා කටයුතු කරන ලදී. 2024 වසරේදී මුලින්ම දියත් කරන ලද මෙම පුහුණු වැඩසටහනෙහි සාර්ථකත්වය මත ඒ තුලින් සිදු වන බලපෑම තව දුරටත් ඉහල නැංවීම සඳහා එහි දෙවන අදියර මෙම වසරේදී හඳුන්වා දෙනු ලැබීය.

ලුණුවිල පිහිටි පොල් වගා මණ්ඩලයට අයත් පොල් සංවර්ධන පුහුණු මධ්‍යස්ථානයේදී පවත්වනු ලැබූ මෙම පුහුණු වැඩසටහන සඳහා දේශීය පොල් වගා කරුවන් 25 දෙනෙකු පමණ එක්ව සිටියහ. එහිදී පස සහ ජලය වැනි ස්වභාවික සම්පත් සංරක්ෂණය කරමින් පොල් අස්වැන්න ඉහළ නංවා ගැනීම සම්බන්ධයෙන් ඔවුන් දැනුවත් කළ අතර තම ගොවිපලවල පුනර්ජනනීය කෘෂිකාර්මික භාවිතයන් ක්‍රියාත්මක කිරීමටද පුහුණු කරන ලදී.

මෙම පුහුණු වැඩසටහන පිළිබඳව අදහස් දක්වමින් පොල් වගා කිරීමේ මණ්ඩලයේ නියෝජ්‍ය සාමාන්‍ය අධිකාරි සුසන්ත ජයලත් මහතා සඳහන් කර සිටියේ “දේශීය පොල් ගොවීන්ට සහාය වීම සඳහා මෙම අර්ථවත් වැඩසටහන දියත් කිරීම වෙනුවෙන් නෙස්ලේ ආයතනය සමඟ නැවත වරක් එක් වීමට ලැබීම පිළිබඳව ඉතාමත් සතුටුයි. ගොවීන්ට පුනර්ජනනීය කෘෂිකාර්මික භාවිතයන් හඳුන්වා දීම තුලින් ඔවුන්ගේ ජීවනෝපාය ඉහළ නැංවීමට මෙන්ම සෞඛ්‍ය සම්පන්න හා වඩා තිරසාර පරිසර පද්ධතියක් උරුම කර දීමට හැකියාව උදා වනවා. ශ්‍රී ලංකාවේ පොල් කර්මාන්තය සැලකිය යුතු අභියෝගයන්ට ලක් වෙමින් පවතින කාල වකවානුවක ගොවීන් වෙනුවෙන් පවත්වනු ලබන මෙම පුහුණු වැඩසටහන ඔවුන්ගේ වගා ක්‍රම වැඩි දියුණු කිරීමට සහ ගොවිතැනට වඩා තිරසාර ප්‍රවේශයක් අනුගමනය කිරීමට ඔවුන්ව දිරිමත් කරනවා” යනුවෙනි.

මෙහිදී අදහස් දැක්වූ නෙස්ලේ ලංකා සමාගමේ සභාපති සහ කළමනාකාර අධ්‍යක්ෂ බර්නි ස්ටෙෆන් මහතා “ දිගු කාලයක් තිස්සේ ක්‍රියාත්මක කරමින් තිබෙන අපගේ පොල් සංවර්ධන සැලසුම මෙරට පොල් වගාව ඉහළ නැංවීම සඳහා වන අපගේ කැපවීමේ සුවිශේෂී සාක්ෂියක් වනවා. ශ්‍රී ලංකාවේ විශාලතම පොල් පිටි කිරි අපනයනකරු ලෙස පොල් සපයන ලබන ගොවීන්ට සහාය වීම සඳහා මෙම වැඩසටහන තව දුරටත් ඉදිරියට ගමන් කිරීම පිළිබඳව මම ඉතාමත් සතුටට පත් වෙනවා. පසුගිය වසරේ නියමු පුහුණු වැඩසටහන දියත් කිරීමේදී ගොවීන්ට පුනර්ජනනීය කෘෂිකාර්මික භාවිතයන් අනුගමනය කිරීමට උපකාර කිරීම අපගේ ඉලක්කය බවට පත් වූණා. මේ සඳහා පොල් වගා කිරීමේ මණ්ඩලය සමඟ එක්වීම තවත් අර්ථවත් ඉදිරි පියවරක් ලෙස සඳහන් කළ හැකියි. 2050 වන විට ශුන්‍ය කාබන් විමෝචනයක් සාක්ෂාත් කර ගැනීම සඳහා වන අපගේ අරමුණෙහි වැදගත් පියවරක් ලෙසත් එය සඳහන් කළ හැකියි. ඒ තුලින් පරිසරයට ප්‍රතිලාභ ලබා දෙන තිරසාර ගොවිතැන් ක්‍රමයන් දිරිගන්වන අතරම පොල් බෝගයේ සම්පූර්ණ හැකියාවන් ප්‍රදර්ශනය කිරීමටද අවස්ථාවක් උදා වනවා.” යනුවෙන් පැවසීය.

වසර 115කට වැඩි කාලයක් තිස්සේ සිය ව්‍යාපාර මෙහෙයුම් සිදු කරමින් සිටින නෙස්ලේ ලංකා සමාගම මෙම පොල් සංවර්ධන සැලසුම හරහා ගෘහස්ත වගාකරුවන්ට අමතරව මධ්‍යම හා මහා පරිමාණ පොල් ගොවීන් 8000කට අධික පිරිසකගේ ජීවනෝපාය ඉහළ නැංවීමට සහාය වී ඇත්තේ දේශීය පොල් කර්මාන්තය සඳහා බිලියන ගණනක දායකත්වයක් ලබා දෙමිනි.