‘හිත හොඳ දඩබ්බරයා’, ‘හිත හොඳ චණ්ඩියා’, ‘චණ්ඩි මාමා’ එකී මෙකී කවර ආකාරයකින් ‘ඇඳිනගත්තා’ වුවත් නමින් ‘පාලිත තෙවරප්පෙරුම’ නම් වූ ඔහුට බොහෝ මිනිසුන් ලෙන්ගතු වුණා. (එසේ වන්නට තරම් ඔහු මිනිසුන් හා සමීප වුණු මහපොළවේ දේශපාලඥයෙකු වුණා.)

පාලිත තෙවරප්පෙරුමගේ ‘කම්පන සහගත හදිසි වියෝව’ සැළ වූ බොහෝ පිරිස් ඔහුට ‘අවසන් ගරු බුහුමන්’ දක්වන්නට පැමිණ සිටියා සේම, පක්ෂ විපක්ෂ බේදයක් හෝ නොමැතිව මැති ඇමතිවරුන් බොහෝ පිරිසක් ද ඔහු සොයා පැමිණ, ඔහු ගැන ‘ගුණ වයන්නට’ වුණා.

ඉන් නොනැවතී සිය ‘සොහොන’ සියැතින් ම ඉදි කොට තිබූ ‘පාලිත’ අවසන් ගමන දා ‘ගයන්නට’ යැයි කියූ ගීතයක්ද (හමාර බණවර) බොහෝ හදවත් සංවේදී කර තිබුණා.

සිය පෞද්ගලික ජීවිතය තුළ වුවද, ‘හැංඟි හොරා’ නැති දේශපාලකයෙකු වූ ‘තෙවරප්පෙරුම’ මීට මාස කිහිපයකට පෙර සහභාගී වූ ‘යුටියුබ් නාලිකා’ වැඩසටහනක දී සිය ‘ප්‍රථම ප්‍රේමය’ ගැන මෙසේ තොරතුරු හෙළි පෙහෙළි කර තිබුණා.

‘ඉස්කෝලේ කාලේ අපිට ආදරේ කරන්න හම්බුණේ නෑ. අපේ ඉස්කෝලෙ ගොඩක් දුප්පත් දුගී දරුවෝ හිටියේ. අපේ පන්තියේ හිටියා කරුණාදාස කියලා ළමෙක්. එයාට සපත්තු තිබුණේ නෑ. කලිසම ඇඳන් ආවේ ගැටගහලා. සමහර ගෙවල්වල මැටි ගහලා තියෙන්නෙ. ආදරේට හිතේ ඉඩක් තිබුණේ නෑ. හැබැයි… ඒ කාලේ හිටියා අපේ පන්තියේ ලස්සන කෙල්ලෙක්. ගීතාංජලී කියලා. මම දන් නෑ මගේ හිතේ පුදුම ආසාවක්, ආදරයක් ඇතිවුණේ ඒකිට. මම ඒකිට හිතින් ආදරේ කළා. තාමත් ආදරෙයි. හැබැයි කෙල්ල දන්නෙත් නෑ මම ආදරෙයි කියලා. මම කෙල්ල එක්ක වචනයක්වත් කතා කරලත් නෑ. මම තාම ගීතාංජලීව හොයනවා. පරණ යාලුවන්ගෙනුත් අහනවා ඒ කෙල්ල කොහෙද කියලා. ඒත් හොයාගන්නම නෑ. එයා තමයි මගේ හිතේ ප්‍රස්ට් ලව් එක. එයාට මම ආසයි, ලෙන්ගතුයි… ඒත් කතා කරන්න බයයි, ලැජ්ජයි. ආදරෙයි කියන්න හිතෙන් නෑ. ඒ තමයි හිතේ ඇති වෙච්ච පළවැනිම ආදරේ….’