සංචිත කළමනාකරණ සමුළුවෙන් ගෝලීය අත්දැකීම් හා නව ප්‍රවේශ පිළිබඳ පුළුල් සංවාදයක්

ප්‍රථම වරට පවත්වන ලද සංචිත කළමනාකරණ සමුළුව මගින් ජාත්‍යන්තර සංචිත කළමනාකරණ ක්ෂේත්‍රයේ මතුවෙමින් පවතින නව ප්‍රවණතා, අභියෝග සහ ඉදිරි අවස්ථා පිළිබඳ ගැඹුරු සංවාදයකට හා අදහස් හුවමාරුවකට අවකාශ සැලසිණි.

දින තුනක් පුරා පැවති මෙම සමුළුවේදී විශේෂඥ ඉදිරිපත් කිරීම් සහ විද්වත් මණ්ඩල සාකච්ඡා මාලාවක් පැවැත්වුණු අතර, ඒ හරහා ලොව විවිධ රටවල සංචිත කළමනාකරණ අත්දැකීම් සහ ක්‍රියාමාර්ග පිළිබඳ දැනුම හුවමාරු කර ගැනීමට අවස්ථාව උදා විය.

විවිධ ජාත්‍යන්තර අත්දැකීම් ඇසුරින් උගත් පාඩම් සහ නවීන ප්‍රවේශයන් පිළිබඳ සාකච්ඡා කිරීම මෙන්ම, මහ බැංකු, ජාත්‍යන්තර මූල්‍ය ආයතන සහ වෙළෙඳපොළ සහභාගිවන්නන් අතර වෘත්තීය සබඳතා තවදුරටත් ශක්තිමත් කර ගැනීමට ද සමුළුව වැදගත් වේදිකාවක් බවට පත්විය.

ශ්‍රී ලංකා මහ බැංකුව විසින් ප්‍රථම වරට සංවිධානය කරන ලද මෙම සංචිත කළමනාකරණ සමුළුව, ජාත්‍යන්තර සංචිත කළමනාකරණ ක්ෂේත්‍රය කෙරෙහි විශේෂ අවධානයක් යොමු කරමින්, ගෝලීය මහ බැංකු ප්‍රජාව සමඟ ශ්‍රී ලංකා මහ බැංකුව පවත්වාගෙන යන සබඳතාවල වැදගත් සන්ධිස්ථානයක් සනිටුහන් කළේය.

ගෝලීය මූල්‍ය පද්ධතිය නියෝජනය කරන ප්‍රමුඛ පෙළේ වෘත්තිකයන් සහ විශේෂඥයන් එක්රැස් කරමින් පැවැත්වූ මෙම සමුළුවේදී, සංචිත කළමනාකරණ ක්ෂේත්‍රයේ වේගයෙන් වෙනස් වෙමින් පවතින ස්වභාවය පිළිබඳව අවධානය යොමු කෙරිණි.

විශේෂයෙන්ම වඩාත් සංකීර්ණ හා අවිනිශ්චිත ගෝලීය මූල්‍ය පරිසරයක් තුළ මතුවන වෙනස්කම්වලට කඩිනමින් අනුවර්තනය වීම, ඉදිරි දැක්මක් සහිතව කටයුතු කිරීම සහ අභියෝග හමුවේ ඔරොත්තු දීමේ හැකියාව ශක්තිමත් කර ගැනීමේ වැදගත්කම පිළිබඳවද සමුළුවේදී පුළුල් ලෙස සාකච්ඡා කෙරිණි.

ගෝලීය මූල්‍ය පරිසරයේ වේගවත් වෙනස්කම් හමුවේ සංචිත කළමනාකරණයේ කාර්යභාරය සහ අනාගත ප්‍රවේශයන් පිළිබඳව නව අදහස් හා අත්දැකීම් හුවමාරු කර ගැනීමට මෙම සමුළුව සුවිශේෂී අවස්ථාවක් සලසා දුන්නේය.