''එකල කිසිදු චැනලයක් ඔහු වෙනුවෙන් සුලු කාලයක් හෝ වෙන් කිරීමට කැමති වූයේ නැත. ඒ, ගාමිණි ජීවරත්නලා දැන් කල් ඉකුත් වූ භාණ්ඩ ලෙස සලකාය....''

ගාමිණි ජීවරත්න නම් සොඳුරුතමයා ගැන, ශෝන් මැක්ස්මස් දිසානායක ලියයි...

''දෙරණ, සිරස, ITN, සියත, රූපවාහිනි ,චැනල් හා ගුවන් විදුලි රාජ්‍ය නාලිකා පවා ‘ගාමිණි ජීවරත්න’ ගැන මීට පෙර දැනගෙන නොසිටියා නොව.

මා ඔහු ගැන ඔවුන්ට කොතෙක් කීවත් ඔවුන් නොවේ පඩේකටවත් මායිම් කළේ.

කුලරත්න ආරියවංශයන්, වසන්ත කුමාර කොබවක, බණ්ඩාර ඇහැළියගොඩ, වැනි විශිෂ්ඨ රචකයන් ලියූ, එමෙන්ම රෝහණ වීරසිංහයන් වැනි සංගීතඥයන්ගේ සංගීතයට ගැයූ අපූරු ගීත ගොන්නක් ඔහු සතුව තිබුණි. ‘මේ සඳ සෙවනේ ‘, ‘සිහිල් සඳුන් පවන්’, ‘පාලොස්වක පුරා හඳට’, වැනි ගීත ඒ අතරේ ඇත.

මා කොතෙක් ඇවිටිලි කරත්, කිසිදු චැනලයක් ඔහු වෙනුවෙන් සුලු කාලයක් හෝ වෙන් කිරීමට කැමති වූයේ නැත. ‘මේ මොකෙක්ද මේ’ කියන අන්දමටය ඔවුන් ඔහු දෙස බැලුවේ.

අවසානයේදී ඔහු වෙනුවෙන් මා රචනා කර, තනුව හැදූ අලුත්ම ගීතය පවා ගුවන් විදුලි නාලිකාවල මෙන්ම, එහී සංගීත වීඩියෝ පටය කිසිදු රූපවාහිනි නාලිකාවක ප්‍රචාරණය කිරීම ප්‍රතික්ෂේප කළේ, ගාමිණි ජීවරත්නලා දැන් කල් ඉකුත් වූ භාණ්ඩ ලෙස සලකාය.

එකල මා නිතරම ඔහු හමුවට ගොස් ඔහුට අවශ්‍ය පසුබිම සකස් කළෙමි. ඔහුගේ පැවැත්මට අවශ්‍ය සියලු දේ මා සකස් කර දුන් අතර, පෞද්ගලිකව මම ඔහුගේ ගීත රේඩියෝ හා ටී වී චැනල්වලට ⁣භාර දී මේවා ප්‍රචාරය කර දෙන ලෙසත්, ඔහුට ටී.වී. චැනල් වල වැඩසටහන් කීපයකට හෝ සහභාගි කරවන ලෙස අනන්තවත් ඉල්ලා සිටියෙමි. එහෙත් ඔවුන්, ගාමිණි ජීවරත්න යනු කල් ඉකුත්වූ භාණඩයක්, කොමර්ෂල් වැලියූ එකක් නැති අයෙක් බව කියා, කිසිදු අවස්ථාවක් නොදුනි.

ප්‍රවීන ගේය රචක බණ්ඩාර ඇහැළියගොඩද, මේ පිළිබඳව මා සමඟ කථා කර තිබූ අතර, ජීවරත්න , ඇහැළියගොඩගේ පදමාලාවට ලියූ ගීත දෙකක්ද මට එවා තිබුණි.

ඔය අතරවාරයේදි එකල යෞවන තරුණ දෙපලක් වූ භාග්‍ය හපුආරච්චි හා ධනුෂ්ක රාජපක්ෂ කාලෝචිත යෝජනාවක් කළහ. ඒ ගාමිණි ජීවරත්න හා ධනුෂ්ක රාජපක්ෂ ලවා යුගල ගීතයක් ගැයීමටය. ඇත්ත කථාව නම් ධනුෂ්ක රාජපක්ෂ යනු ගායකයෙක් නොව, එලෙසම භාග්‍ය හපුආරච්චි යනු නැටුම් ශිල්පියෙක්ද නොව. එහෙත් මම ගාමිණි ජීවරත්න වැනි මැදි විය ඉක්මවූ ගායකයෙක් හා ධනුෂ්ක රාජපක්ෂ වැනි ආධුනික තරුණයෙක් ව එක්කර, ‘මේක සොඳුරු ලෝකයක්’ නමින් ගීතයක් නිර්මාණය කර තැටි ගත කළෙමි. ගාමිණි ජීවරත්නගේ භාවමය ශෛලය වෙනස් කර 6×8 රිද්මයට හරවා ඔහුගේ ගායන ක්‍රමය වෙනස් කළෙමි. ගායකයෙක් නොවුණු ධනුෂ්කව ගායකයෙක් කළෙමි. ඉන් පසු එය රූපණයක් කළ අතර, එය මා අධ්‍යක්ෂනය කළ අතරම එය පුරා දිනයක් උස්වැටකෙයියා වේදී ගාමිණි ජීවරත්න සමඟ රූ ගත කළෙමු. ඒ තුළින් මා ගාමිණි ජීවරත්න ප්‍රථම වරට Music Video එකක රංඟන ශිල්පියෙක් කල අතර, භාග්‍ය හපුආරච්චිව නැටූම් ශිල්පියෙක් කළෙමි.

එදා ගාමිණී ජීවරත්නට, මා සමඟ එක්වී යළි කරලියට එන්නට අතහිත දුන්නේ සල්ලිකාර කොල්ලො දෙන්නෙක් නොවේ. සාමාන්‍ය ලෙස ජීවත් වන තරුණයන් දෙදෙනෙකු වූ භාග්‍ය හපුආරච්චි හා ධනුෂ්ක රාජපක්ෂය.

ගාමිණි ජීවරත්න ට ජීවිතය පවත්වා යාමටත්,උපකාර කිරීමෙනුත්, ඔහු වෙනුවෙන් සංගීත ප්‍රසංග සංවිධානය කිරීමටත් මා උර දුන් අතර, ජීවරත්නට නැවත තමන්ගේම ගීතයක් ගැයීමට නිර්ලෝභිව මුදල් වැය කරමින් වපසරිය සාදා දුන්නේ භාග්‍ය හපුආරච්චි හා ධනුෂ්ක රාජපක්ෂ ය. ඒ භාග්‍ය හා ධනු නිශ්පාදනය කළ, මා තනුව හා රචනා කල ‘මේක සොඳුරු ලෝකයක්’ ගීතයෙනි. මෙහී රූපණයේ (Visual) නිශ්පාදනයද භාග්‍ය හා ධනුෂ්ක ගෙනි. අධ්‍යක්ෂනය මගෙනි. භාග්‍ය හා ධනුෂ්ක මෙම කර්තව්‍යය කළේ සතපහක ආදායමක් බලාපොරොත්තුවෙන් නොවේ. ඔවුන් ගාමිණි ජීවරත්නයන්ට තිබූ ලෙන්ගතු කම නිසාමය මෙම කර්තව්‍යය කළේ.

ගාමිණි ජීවරත්න රඟපෑ මෙම වීඩියෝව අප නිර්මාණය කළේ මීට අව්රුදු දෙකකට පමණ පෙරය. එහෙත් එය අද වෙන තෙක් මා එළිදැක්වූයේ නැත. එයට හේතුවක් තිබේ. අප මෙය නිර්මාණය කළේ ටී.වී. චැනල් හී ප්‍රචාරය කිරීමටය. අද ගාමිණි ජීවරත්න ව වෙළදාම් කරමින් සිටින රූපවාහිනි, ITN, සිරස, සියත, දෙරණ, හිරු, ස්වණවාහිනි වැනි මාධ්‍ය කිසිවෙක් මෙම විඩියෝ පටය භාරගත්තෙ නැත. ඔවුන් හැම විටම කීවේ, ගාමිණි ජීවරත්න ලා යල් පැන ගිය අය නිසා මෙම වීඩියෝව ප්‍රචාරය කිරීමට නොහැකි බවකි. කෙතරම් උත්සහා කළද, කිසිදු චැනලයක් භාර ගත්තේද නැත.

එහෙත් අද හැම චැනල් එකක්ම ගාමිණි ජීවරත්නගේ පස්සෙන් හුරේ රන් ය. එදා මාත්, භාග්‍ය හා ධනුෂ්කත් ගාමිණි ජීවරත්න ගැන සොයා බලන විට එකී ටීවී, රේඩියෝ, යූ ටියුබ් ඔහුව පඩේකටවත් මායිම් කළේ නැත. නමුත් අද, සමාජ මාධ්‍ය විසින් ඔසවා තැබූ ඔහු වටා බඩ වැල් වගේ ඇදෙන චැනල් කාරයෝ, සංගීත සංවිධායකයන් දෙස, මමත් භාග්‍යයත්, ධනුෂ්කත් උපේක්ෂා වෙන් බලා සිටිමු. අද මේ රැල්ලක් සේ ගසා එන ඒ චැනල් හා සංවිධායකයන් එදා ගාමිණි ජීවරත්න දෙස හැරී නොබැලුවේ ඇයි?. මාත් භාග්‍යයත්, ධනුෂ්ක ත් ඔවුන්ගෙන් අසන ප්‍රශ්නයද එයයි.

ඒ කෙසේ වෙතත් අප මීට අව්රුදු තුනකට පෙර ප්‍රාර්ථනා කල ස්ථානය, ජනප්‍රියත්වය පමා වී හෝ ඔහුට දැන් ලැබී ඇත. එහෙත් එදා මා චැනල් හරහා ගොස් ඔහුට නිසි සාධාරණයක් කිරීමට ගත් උත්සහායේදී එකී චැනල් ඉදිරිපත් වූවා නම් අද ඔහු ඉහලම ජනප්‍රියත්වයක් ලබා ගැන්මට ඉඩ තිබුණි. චැනල් වලින් නොසලකපු ගාමිණි ජීවරත්න ව යලි උඩට ගැනීමේ ප්‍රයත්නයක යෙදුනු භාග්‍ය හපුආරච්චි හා ධනුෂ්ක රාජපක්ෂ යන තරුණයන් දෙදෙනාට, මල් මිටක් පුද කල යුතුය.

‘මේක සොඳුරු ලෝකයක්’ ගීතයේ රූපණය කවදා හෝ පෙන්වන්නේ රූපවාහිනි චැනලයකය. එතෙක් එය එලිදක්වන්නෙ නැත. ඒ ගාමිණි ජීවරත්න ගේ ප්‍රථම වීඩියෝ පටය එකවරම මුලු ලංකාවම දැක ගත යුතු නිසාය.

අපි කාලයාට ඉඩ දෙමු. එය නිසි වේලාවෙිදි, නිසි අයුරින් සිදු වේවි.

ලිපිය නිම කිරීමට පෙර, පුංචි සංවාදයකින් නිම කරමු. ගිය සතියේ මට ඔහුගෙන් ඇමතුමක් පැමිණීය.

මම:
‘දැන් හරි ජනප්‍රියයි නේද?

ගාමිණි : ‘ඒවා තාවකාලිකයි ශෝන් මහත්තයා. ඒත් එදත්, අදත් මතුවටත් මට ඉන්නෙ ශෝන් මහත්තයා විතරයි.

ඒ දරුණු ලෙස ඩිමෙන්ෂියා නම් අමතකවීමේ රෝගයෙන් පෙ⁣ළෙන ගාමිණි ජීවරත්න නම් වු සොඳුරු, අහිංසක මිනිසා පෙන්වූ උදාර වූ මිනිසත්කමයි...''