AIවලින් බඩකුත් හදලා. ඒත් තවම එහෙම නෑ... - ශලනි තාරකා

ජනප්‍රිය නිළි ශලනි තාරකා මේ දවස්වල අන් කවරදාටත් වඩා කතාබහට ලක්වන චරිතයක් වෙලා.

ඒකට හේතුව ඔබ දැනටමත් දන්නවා.

ඒ ''වීදුරු තිර'' ටෙලි නිර්මාණය නිසාවෙන්.

සමාජයේ කතාබහට ලක්වන නමුත්, නිර්මාණ තුළින් ප්‍රසිද්ධියේ කතාබහ නොකෙරෙන සමලිංගික ප්‍රේමයකියි, ''වීදුරු තිර'' ඔස්සේ කතාබහට ලක්වන්නේ.

විශේෂයෙන්ම තමන් තමන්ව පිළිනොගැනීම හේතුවෙන් උද්ගත වන අර්බුද ගැන මෙහි කතාබහට ලක්වනවා.

එහි ශලනි රඟන චේතිගේ චරිතය වඩාත් සුවිශේෂීයි.

රංගනය තුළ එහෙම කතාබහට ලක්වෙන ශලා, පහුගිය දවසක සිය විවාහයේ දෙවන වසරත් සමරනු ලැබුවා.

ඉතින්, ලංකාවෙනුත් එහාට ගිහින් සැමියත් එක්ක කැනඩාවේ ගෙවන ජීවිතේ ගැන ඈ කියන කතාවයි මේ...

''කැනඩාවේ දී මම සාමාන්‍ය ගෘහිනියක් විදියට ජීවත් වෙනවා. ඉඩක් ලැබුණු වෙලාවට එළියට ගිහින් ඒ රටේ තියෙන දේවල් බලන්න යනවා. ගෙදරට වෙලා කාලය ගත කරද්දී මම මගේ ඉදිරි නිර්මාණ කටයුතු ගැන හොයලා බලනවා. ඒ හැර විශේෂ දෙයක් නැහැ.''

''ලංකාව කියන්නේ මගේ උපන් රට. කොහේ ගියත් මට මගේ රට මතක් වෙනවා. කැනඩාවේ දැනට මම ජීවත් වෙනවා. පුළුවන් හැම වෙලාවකම මම ලංකාවට ඇවිත් යන්න එනවා.''

ගෙවුණු කාලයේ ශලා ප්‍රෙග්නන්ට් කියලා කතාබහකුත් පැතිරෙන්න ගත්තා...

''...එහෙම කතාවකුත් සමාජ මාධ්‍ය තුළ පැතිර යනවා මමත් දැක්කා. සමහර අය AI තාක්ෂණයෙන් බඩකුත් හදලා දාලා තිබ්බා. නමුත් තවම එහෙම සුදානමක් නැහැ. මම විශ්වාස කරන්නේ ඒ දේවල් හරි වෙලාවට සිද්ධ වෙයි කියලා.''

ශලනි තාරකා කියන්නෙ විවිධ වූ අභියෝගයන්ට මුහුණ දුන්නු චරිතයක්,

''...කතාවකුත් තියෙනවානේ තැළෙන්න තැලෙන්න යකඩයක් වුණත් මුවහත් වෙනවා කියලා. ඒ වගේ තමයි ඕනෙම කෙනෙක්ගේ ජීවිතේට ප්‍රශ්න අභියෝග එන්න පුළුවන්. ඒ තැන්වලදී ඒ හැම දෙයක් ගැනම සුබවාදී විදියට හිතලා ඒ ලැබෙන්නේ ජිවිතේට තවත් එක පාඩමක් කියලා හිතලා තමයි මම එන හැම තැනකදීම මුහුණ දුන්නේ.

''ආපසු හැරිලා බලද්දී ඇත්තටම ගොඩක් සතුටුයි. මම මේ කාලය තුළ ළඟා කර ගත්තු දේවල් සහ මම අද ඉන්න තැන ගැන අවංකවම සතුටු වෙනවා.''

උපුටාගැනීම : රසඳුන | අනූෂා රණසිංහ