අගෝස්තුවේ නිෂ්පාදන හා සේවා ක්‍රියාකාරකම්වල වර්ධනයක්

2026 අගෝස්තු මාසයේදී ශ්‍රී ලංකාවේ නිෂ්පාදන සහ සේවා අංශ දෙකෙහිම ක්‍රියාකාරකම් වර්ධනය වී ඇති බව ගැනුම් කළමනාකරුවන්ගේ දර්ශක (PMI) මගින් පෙන්වා දෙයි.

නිෂ්පාදන අංශයේ ශ්‍රී ලංකා ගැනුම් කළමනාකරුවන්ගේ දර්ශකය අගෝස්තු මාසයේදී දර්ශකාංක 53.0ක් ලෙස වාර්තා වී තිබේ.

එය පෙර මාසයට සාපේක්ෂව වර්ධන වේගය තරමක් මන්දගාමී වී තිබුණද, නිෂ්පාදන ක්‍රියාකාරකම් තවදුරටත් වර්ධනය වන බව පෙන්නුම් කරන අගයකි.

නිෂ්පාදන උප දර්ශකය හැර අනෙකුත් සියලුම උප දර්ශක අගෝස්තු මාසයේදී කඩඉම් මට්ටමට ඉහළින් පැවති බව සඳහන් වේ.

නව ඇණවුම් උප දර්ශකය අගෝස්තු මාසයේදී කඩඉම් මට්ටමේම පැවතීම හේතුවෙන් නව ව්‍යාපාරික ක්‍රියාකාරකම් සමස්තයක් ලෙස සැලකිය යුතු වෙනසකින් තොරව පැවති බව දක්නට ලැබේ.

මේ අතර, නිෂ්පාදන උප දර්ශකයේ වර්ධන වේගය මන්දගාමී වීමට ප්‍රධාන වශයෙන් රෙදිපිළි හා ඇඟලුම් නිෂ්පාදන අංශයේ ක්‍රියාකාරකම් පහළ යෑම බලපා තිබේ.

වසර අවසාන උත්සව සමය වෙනුවෙන් නිෂ්පාදන කටයුතු අඛණ්ඩව පවත්වාගෙන යාම සඳහා සේවකයන් බඳවා ගැනීම සහ ක්‍රමිකව තොග රැස් කිරීම හේතුවෙන් අගෝස්තු මාසයේදී සේවා නියුක්තිය සහ තොග මිලදී ගැනීම් යන උප දර්ශක දෙකම ඉහළ ගොස් තිබේ.

එසේම, පවතින සැපයුම් බාධාවන් හේතුවෙන් ඇණවුම් සැපයීම සඳහා සැපයුම්කරුවන්ට ගතවන කාලය අගෝස්තු මාසයේදී තවදුරටත් දීර්ඝ වී ඇත.

කාලීන අභියෝග හේතුවෙන් නිෂ්පාදන ක්‍රියාකාරකම්වල යම් මන්දගාමී වීමක් දක්නට ලැබුණද, වසර අවසාන උත්සව සමයෙන් ලැබෙන ඉල්ලුම හේතුවෙන් ඉදිරි කාලය සඳහා නිෂ්පාදන අංශයේ අපේක්ෂා තවදුරටත් ධනාත්මක මට්ටමක පවතින බව PMI දත්ත පෙන්වා දෙයි.

සේවා අංශයේ වේගවත් වර්ධනයක්

මේ අතර, සේවා අංශයේ ශ්‍රී ලංකා ගැනුම් කළමනාකරුවන්ගේ දර්ශකය අගෝස්තු මාසයේදී දර්ශකාංක 65.6ක් ලෙස වාර්තා වී තිබේ.

එය පෙර මාසයට සාපේක්ෂව සේවා ක්‍රියාකාරකම්වල වර්ධනය වේගවත් වී ඇති බව පෙන්නුම් කරයි.

බොහෝ සේවා අංශවල සිදුවූ වැඩිදියුණු වීම් හේතුවෙන් අගෝස්තු මාසයේදී සේවා අංශයේ ව්‍යාපාරික ක්‍රියාකාරකම් ශක්තිමත් ලෙස වර්ධනය වී ඇත.

මෙම වර්ධනය සඳහා ප්‍රවාහන, තොග හා සිල්ලර වෙළෙඳාම සහ වෘත්තීය සේවා යන උප අංශවල ශක්තිමත් ක්‍රියාකාරිත්වය ප්‍රධාන වශයෙන් දායක වී තිබේ.

මූල්‍ය සේවා සහ අනෙකුත් පෞද්ගලික සේවා ද මෙම වර්ධනය සඳහා සැලකිය යුතු දායකත්වයක් ලබා දී ඇත.

අගෝස්තු මාසයේදී නව ව්‍යාපාර ද වර්ධනය වී ඇති අතර, තොග හා සිල්ලර වෙළෙඳාම මෙන්ම මූල්‍ය හා අනෙකුත් පෞද්ගලික සේවා අංශවල වර්ධනය ඊට ප්‍රධාන වශයෙන් බලපා තිබේ.

වෘත්තීය සේවා අංශය ද නව ව්‍යාපාර වර්ධනයට ධනාත්මක දායකත්වයක් ලබා දී ඇත.

නව සේවක බඳවා ගැනීම් ඉහළ යෑමත් සමඟ අගෝස්තු මාසයේදී සේවා අංශයේ සේවා නියුක්තිය ද වැඩි වී තිබේ.

එමෙන්ම, නිම කිරීමට ඉතිරිව තිබූ කාර්යයන් ප්‍රමාණය පෙර මාසයේ වාර්තා වූ ඉහළ යෑම ආපසු හරවමින් අගෝස්තු මාසයේදී පහළ ගොස් ඇත.

ඉදිරි කාර්තුව සඳහා ව්‍යාපාරික ක්‍රියාකාරකම් පිළිබඳ අපේක්ෂා ද අගෝස්තු මාසයේදී ධනාත්මක මට්ටමක පැවතිණි.

අපේක්ෂිත ආර්ථික වැඩිදියුණු වීම් සහ සංචාරක පැමිණීම්වල වර්ධනය මෙම ධනාත්මක අපේක්ෂාවන්ට සහාය වී තිබේ.

කෙසේ වෙතත්, ගෝලීය ආර්ථිකයේ පවතින පුළුල් අවිනිශ්චිතතා හේතුවෙන් ඉදිරි ආර්ථික ක්‍රියාකාරකම් සඳහා අහිතකර අවදානම් තවදුරටත් පවතින බව ද PMI දත්ත පෙන්වා දෙයි.