இலங்கையில் முதலீடு செய்ய தயங்கும் வெளிநாடுகள்?

2022 பொருளாதார நெருக்கடியிலிருந்து இலங்கை தொடர்ச்சியாக மீண்டு வருவதோடு, வலுவான பொருளாதார வளர்ச்சியையும் பதிவு செய்து வருகின்ற போதிலும், நாட்டின் முதலீட்டுச் சூழல் இன்னமும் கணிசமான சவால்களை எதிர்கொண்டு வருகின்றது.

ஒழுங்குமுறை மாற்றங்களின் கணிப்பிட முடியாத தன்மை, அதிகாரத்துவத் தடைகள், கொள்கை மாற்றங்கள் மற்றும் வெளிப்படைத்தன்மை இன்மை ஆகியன குறித்து வெளிநாட்டு முதலீட்டாளர்கள் தொடர்ந்து கவலை வெளியிட்டு வருவதாக இலங்கையின் முதலீட்டுச் சூழல் குறித்த புதிய மதிப்பீட்டு அறிக்கை சுட்டிக்காட்டுகின்றது.

அமெரிக்க வெளியுறவு அமைச்சின் 2026 இலங்கை முதலீட்டுச் சூழல் அறிக்கையின்படி, சுமார் 22 மில்லியன் சனத்தொகையை கொண்ட குறைந்த-நடுத்தர வருமானம் பெறும் நாடான இலங்கை, 2025 ஆம் ஆண்டில் எதிர்பார்ப்புகளையும் விஞ்சி 5 சதவீத மொத்த உள்நாட்டு உற்பத்தி (GDP) வளர்ச்சியைப் பதிவுசெய்து, தனது பொருளாதார மீட்சியை வலுப்படுத்தியுள்ளது.

2024 ஆம் ஆண்டின் பிற்பகுதியில் ஜனாதிபதி அனுர குமார திசாநாயக்க மற்றும் தேசிய மக்கள் சக்தி (NPP) பெற்ற தேர்தல் வெற்றிகள் அரசியல் ஸ்திரத்தன்மையை வழங்கியுள்ளன.

அதேவேளை, சர்வதேச நாணய நிதியத்தின் (IMF) 3 பில்லியன் அமெரிக்க டொலர் மதிப்பிலான நான்கு ஆண்டுகளுக்கான விரிவாக்கப்பட்ட நிதி வசதி (EFF) திட்டத்திற்கு அரசாங்கம் வழங்கியுள்ள அர்ப்பணிப்பும் முதலீட்டாளர்களுக்கு நம்பிக்கையை அளித்துள்ளது.

இருப்பினும், இலங்கைச் சந்தையின் திறந்ததன்மை குறித்த தெளிவற்ற அல்லது முரண்பாடான செய்திகள் காரணமாக முதலீட்டாளர்கள் தொடர்ந்து எச்சரிக்கையுடன் செயல்படுவதாக அந்த மதிப்பீடு கூறுகிறது.

உற்பத்தித் துறை, துறைமுக மேம்பாடு, சுற்றுலாத் துறை, தகவல் தொழில்நுட்பம் மற்றும் வணிகச் செயல்முறை வெளிப்படைத்தன்மை ஆகியவை அந்த ஆண்டில் அதிக வெளிநாட்டு முதலீடுகளை ஈர்த்த துறைகளாக அடையளம் காணப்பட்டுள்ளன.

இலங்கை தனது அந்நிய நேரடி முதலீட்டு இலக்குகளை அடைய வேண்டுமாயின் கொள்கை ஸ்திரத்தன்மை, ஒழுங்குமுறை சீர்திருத்தம், திறமையான தொழிலாளர்களின் பயன்பாடு, தொழிற்துறை நிலங்களுக்கான அணுகல், திறமையான தளவாடங்கள் (logistics) மற்றும் நெறிப்படுத்தப்பட்ட வர்த்தக நடைமுறைகள் ஆகியவை மேம்படுத்தப்பட வேண்டிய முக்கிய துறைகளாகும் என இந்த மதிப்பீட்டில் மேற்கோள் காட்டப்பட்டுள்ள முதலீட்டு நிபுணர்கள் குறிப்பிடுகின்றனர்.

தடையற்ற வர்த்தக ஒப்பந்தங்கள் (FTAs) மூலம் விருப்பத்தேர்வு ஏற்றுமதி சந்தைகளுக்கான (preferential export markets) அணுகல் முதலீட்டாளர்களுக்கு ஒரு முக்கியமான கருத்தாகும். ஏனெனில் இத்தகைய ஒப்பந்தங்கள் ஏற்றுமதிப் போட்டித்தன்மையை மேம்படுத்துவதோடு, இறக்குமதி செய்யப்படும் மூலப்பொருட்கள் மற்றும் இடைநிலைப்பொருட்களின் செலவைக் குறைக்கும் என்றும் அறிக்கை குறிப்பிடுகிறது.

வெளிநாட்டு முதலீடுகளை ஊக்குவிக்க அரசாங்கம் முயற்சிகளை மேற்கொண்ட போதிலும், ஒழுங்குமுறை மாற்றங்களின் கணிப்பிட முடியாத தன்மை, அதிகாரத்துவத் தடைகள் மற்றும் தேர்ந்தெடுக்கப்பட்ட வெளிப்படைத்தன்மை ஆகியவை வெளிநாட்டு நிறுவனங்களின் பரந்த பங்கேற்பைத் தொடர்ந்து கட்டுப்படுத்துவதாக அறிக்கை கூறுகிறது.

திட்டங்கள் கைவிடப்படுதல், ஒழுங்குமுறை மாற்றங்கள், மெதுவான முடிவெடுக்கும் நடைமுறைகள் மற்றும் ஏற்கனவே நிறுவப்பட்ட வணிகங்களுக்குப் போதிய ஆதரவின்மை ஆகியவற்றை முதலீட்டாளர்கள் தங்களின் கவலைகளாக சுட்டிக்காட்டியுள்ளனர்.

அதேவேளை, வர்த்தக வசதி, டிஜிட்டல் மயமாக்கல் மற்றும் வலுவான ஆளுகை வழிமுறைகள் உட்பட பரந்த கட்டமைப்புச் சீர்திருத்தங்களின் முக்கியத்துவத்தை சர்வதேச நாணய நிதியமும் உள்ளூர் வணிகச் சங்கங்களும் வலியுறுத்தியுள்ளன.