හිටපු ශ්‍රී ලංකා ක්‍රිකට් ක්‍රීඩකයෙකුට, වසර පහක ක්‍රිකට් තහනමක්

ශ්‍රී ලංකා හිටපු ක්‍රිකට් ක්‍රීඩකයෙකු වන සාලිය සමන්ට ජගත් ක්‍රිකට් කවුන්සලය විසින් වසර පහක ක්‍රිකට් තහනමක් පනවා තිබෙනවා.

අයි.සී.සීය නිවේදනයක් නිකුත් කරමින් සදහන් කළේ එමිරේට්ස් ක්‍රිකට් මණ්ඩලයේ (ECB) දූෂණ විරෝධී සංග්‍රහය උල්ලංඝනය කිරීම හේතුවෙන් ඔහුට එරෙහිව මෙම තහනම පැනවූ බවයි.

2023 වසරේ සැප්තැම්බර් මාසයේදී එමිරේට්ස් ක්‍රිකට් මණ්ඩලයේ (ECB) දූෂණ විරෝධී සංග්‍රහය උල්ලංඝනය කිරීම සම්බන්ධයෙන් අට දෙනෙකුට එරෙහිව චෝදනා ගොනු කෙරුණා. එම පුද්ගලයින් අට දෙනා අතරට 39 හැවිරිදි සාලිය සමන් ද ඇතුළත්.

අබුඩාබි T10 ලීග් ක්‍රිකට් තරගාවලිය යටතේ 2021 වසරේ පැවති තරගාවලියේදී තරග පාවාදීමට ගත් උත්සාහයක් පිළිබඳ සාලිය සමන්ට චෝදනා එල්ල වුණා.

ඒ අනුව පූර්ණ විභාගයකින් හා ලිඛිත මෙන්ම වාචික තර්ක ඉදිරිපත් කිරීමෙන් අනතුරුව විනිශ්චය සභාවක් විසින් සාලිය සමන් චෝදනා 3කට වරදකරු බව තීරණය කර තිබෙනවා.

ඔහුට එරෙහිව පනවන ලද තහනම 2023 වසරේ සැප්තැම්බර් 13 වන දින සිට එනම්, ඔහුට එරෙහිව තාවකාලික ක්‍රිකට් තහනමක් පැනවූ දිනයේ සිට ක්‍රියාත්මක වන බව අයි.සී.සීය සදහන් කළා.