LOLC හෝල්ඩිංග්ස් පීඑල්සී, වෙතින් කෙරෙන මහජන දැනුම්දීමයි

LOLC Holdings PLC සමාගම සහ මහජන බැංකුව (People’s Bank) අතර සිදු වූ බැංකු ණය පහසුකමක් සම්බන්ධයෙන් සමාජ මාධ්‍ය සහ අන්තර්ජාලය ඔස්සේ සංසරණය වන තොරතුරු අසත්‍ය සහ සප්‍රමාණික නොවන බව පවසමින් LOLC Holdings PLC සමාගම විසින් නිල පැහැදිලි කිරීමක් නිකුත් කර තිබේ.

එම නිවේදනයට අනුව අදාළ සිදුවීමේ ප්‍රධාන කරුණු මෙසේය:

ණය පහසුකම සහ ඇපකරය: මෙම දේශීය මුදල් ණය පහසුකම, LOLC Group විසින් මහජන බැංකුවේම පවත්වාගෙන යනු ලබන ඇමෙරිකානු ඩොලර් (USD) තැන්පතුවකට පූර්ණ ලෙස මුදලින්ම ඇප වී ඇති (fully cash-secured) එකකි. LOLC සමූහය තම ගෝලීය භාණ්ඩාගාර කළමනාකරණ ක්‍රියාවලිය යටතේ මහජන බැංකුව ඇතුළු දේශීය හා විදේශීය මූල්‍ය ආයතන කිහිපයකම විදේශ විනිමය තැන්පතු පවත්වාගෙන යයි.

දේශීය මුදල් අරමුදල් ලබාගැනීම: ශ්‍රී ලංකාවේ ක්‍රියාත්මක LOLC සමූහයේ ආයතන මෙම විදේශ විනිමය තැන්පතුවල ඇපකර වටිනාකම (collateral value) භාවිතා කරමින් දේශීය මුදල් අරමුදල් රැස්කර ගන්නා අතර, එමගින් අදාළ ණය පහසුකම සඳහා මහජන බැංකුවට පූර්ණ ඇපකර ආවරණයක් හිමි වේ.

අසත්‍ය ප්‍රකාශ ප්‍රතික්ෂේප කිරීම: අදාළ තැන්පතුවේ පැවැත්ම හෝ එය පිහිටි ස්ථානය පිළිබඳව සැක සහිත බව, මහජන බැංකුවට හඳුනා නොගත් විදේශීය වත්කමක් අත්පත් කර ගැනීමට සිදුවන බව හෝ මෙම ගනුදෙනුව රාජ්‍ය මුදල් අවදානමකට ලක් කිරීමක් බවට පැතිර යන ප්‍රකාශවල කිසිදු පදනමක් නොමැති බව LOLC අවධාරණය කරයි.

සාමාන්‍ය භාණ්ඩාගාර ගනුදෙනුවක් වීම: රටවල් 27 කට අධික සංඛ්‍යාවක ව්‍යාපාරික කටයුතු පවත්වාගෙන යන බහුජාතික සමාගමක් ලෙස, පවතින ඇමෙරිකානු ඩොලර් වත්කම් ශ්‍රී ලංකා රුපියල් බවට පරිවර්තනය නොකර, ඒවායේ වටිනාකම ඇපයට තබා ගනිමින් දේශීය මුදල් ලබා ගැනීම සාමාන්‍ය ගෝලීය භාණ්ඩාගාර ක්‍රමවේදයක් (conventional treasury transaction) බව සමාගම පෙන්වා දෙයි.

වැරදි මතවාද ගොඩනැගීම: මෙම ගනුදෙනුව සැක සහිත බැංකු ක්‍රියාකාරකමක්, විදේශ විනිමය සමපේක්ෂණයක් (foreign exchange speculation) හෝ රාජ්‍ය අරමුදල් අයථා ලෙස භාවිත කිරීමක් ලෙස නිරූපණය කිරීමට දැරූ උත්සාහයන් පදනම් විරහිත බවත්, එමගින් තත්ත්වය විකෘති කර පෙන්ވާ ඇති බවත් සමාගම සඳහන් කරයි.

නීතිමය සහ නියාමන පියවර: මෙම අසත්‍ය සහ නොමඟ යවන සුළු ප්‍රකාශවල බරපතලකම සැලකිල්ලට ගනිමින්, ඒ පිළිබඳව අදාළ නියාමන සහ වෙනත් බලධාරීන්ගේ අවධානයට යොමු කිරීමට LOLC පියවර ගනිමින් සිටී. එසේම අසත්‍ය තොරතුරු නිර්මාණය කළ, ප්‍රකාශයට පත් කළ හෝ දිගින් දිගටම සංසරණය කළ පුද්ගලයින්ට සහ සංවිධානයන්ට එරෙහිව පවතින නීතිමය හිමිකම් සහ පියවර ගන්නා බවද සමූහය තහවුරු කරයි.

තමන් ඉදිරියටත් විනිවිදභාවයෙන් සහ වගකීමෙන් කටයුතු කරමින්, සමූහයේ සහ කොටස්කරුවන්ගේ අයිතිවාසිකම් සුරැකීමට අවශ්‍ය සියලු පියවර ගන්නා බව LOLC Holdings PLC වැඩිදුරටත් ප්‍රකාශ කර ඇත.