සංචාරක SME ක්ෂේත්‍රය ශක්තිමත් කිරීමට ASMET නව උපායමාර්ගයකට

ASMET 19 වැනි වාර්ෂික මහා සභා රැස්වීම කොළඹදී

ශ්‍රී ලංකාවේ සංචාරක ක්ෂේත්‍රයට සම්බන්ධ කුඩා හා මධ්‍ය පරිමාණ ව්‍යවසායකයන්ගේ (SMEs) ප්‍රධාන නියෝජිත සංවිධානයක් වන සංචාරක ක්ෂේත්‍රයේ කුඩා හා මධ්‍ය පරිමාණ ව්‍යවසායකයන්ගේ සංගමය (ASMET) සිය 19 වැනි වාර්ෂික මහා සභා රැස්වීම (AGM) පසුගියදා කොළඹ 03 පිහිටි ශ්‍රී ලංකා සංචාරක හා හෝටල් කළමනාකරණ ආයතනයේ (SLITHM) ශ්‍රවණාගාරයේදී පැවැත්වීය.

මෙම අවස්ථාවට ප්‍රධාන ආරාධිත අමුත්තා ලෙස ශ්‍රී ලංකා සංචාරක ප්‍රවර්ධන කාර්යාංශයේ සභාපති හා කළමනාකාර අධ්‍යක්ෂ D.M.S. නිරෝෂන් මහතා සහභාගී විය.

ASMET සභාපති දෙව්මින් කන්ගොඩ ආරච්චි මහතා, උප සභාපති රේණුකා ජයමාන්න මහත්මිය, ප්‍රධාන ලේකම් කුමර් සන්දම්බරමි මහතා සහ භාණ්ඩාගාරික රෝහණ හෙට්ටිආරච්චි මහතා ඇතුළු සංගමයේ නිලධාරීන් සහ සාමාජිකයන් රැසක් ද මෙම අවස්ථාවට එක්වූහ.

සංචාරක ක්ෂේත්‍රයේ කුඩා හා මධ්‍ය පරිමාණ ව්‍යවසායකයන්ගේ අවශ්‍යතා සහ සුබසාධනය වෙනුවෙන් පෙනී සිටිමින්, ශ්‍රී ලංකාවේ සංචාරක ක්ෂේත්‍රය තුළ ඔවුන්ගේ හඬ නියෝජනය කිරීම ASMET හි ප්‍රධාන අරමුණක් බව සංගමය පෙන්වා දෙයි.

වගකිවයුතු, සියල්ලන් ඇතුළත් සහ තිරසාර සංචාරක සංවර්ධනයක් ප්‍රවර්ධනය කිරීම මෙන්ම, SME සංචාරක ව්‍යවසායකයන් අතර සහයෝගීතාව ශක්තිමත් කිරීම සඳහා ද සංගමය අඛණ්ඩව කටයුතු කරයි.

එමෙන්ම රජයේ ආයතන, සංචාරක කර්මාන්තයේ හවුල්කරුවන් සහ ජාත්‍යන්තර සංචාරක වෙළෙඳපොළ සමඟ සමීප සබඳතා ගොඩනැගීම හරහා ශ්‍රී ලංකාවේ සංචාරක SMEs සඳහා නව ව්‍යාපාරික අවස්ථා නිර්මාණය කිරීම කෙරෙහි ද ASMET අවධානය යොමු කර තිබේ.

මේ වන විට අත්කරගෙන ඇති ප්‍රගතිය තවදුරටත් ඉදිරියට ගෙන යමින්, සංචාරක ක්ෂේත්‍රයේ SME ප්‍රජාව වෙනුවෙන් ශක්තිමත් නියෝජිත හඬක් ලෙස ASMET හි භූමිකාව තවදුරටත් පුළුල් කිරීමට අලුතින් තේරී පත් වූ විධායක කමිටුව ප්‍රතිඥා දී ඇත.

ඒ අනුව, සංගමයේ සාමාජිකයන් සඳහා නව ව්‍යාපාරික හා ආයෝජන අවස්ථා නිර්මාණය කිරීම, දේශීය හා ජාත්‍යන්තර හවුල්කාරිත්වයන් තවදුරටත් ශක්තිමත් කිරීම, නවෝත්පාදන හා ඩිජිටල් පරිවර්තනය දිරිගැන්වීම මෙන්ම ශ්‍රී ලංකාවේ සංචාරක කර්මාන්තයේ දිගුකාලීන තරඟකාරීත්වය ශක්තිමත් කිරීම ඉදිරි කාලයේදී සංගමයේ ප්‍රමුඛ අවධානය යොමු වන ක්ෂේත්‍ර ලෙස හඳුනාගෙන තිබේ.

තවද, නව ව්‍යවසායකයන්, නැගී එන සංචාරක ව්‍යාපාර සහ විවිධ සේවා සපයන්නන් නිසි ලියාපදිංචි කිරීමේ ක්‍රමවේද සහ නීතිමය මාර්ග ඔස්සේ සංචාරක ක්ෂේත්‍රයට එක්වීම දිරිගැන්වීමට ASMET කටයුතු කරනු ඇත.

එම ව්‍යාපාර වෘත්තීයමය, වගකීම් සහගත සහ නීතිගරුක ආකාරයෙන් පවත්වාගෙන යාම සඳහා අවශ්‍ය මඟපෙන්වීම සහ සහාය ලබාදීම ද සංගමයේ අරමුණකි.

ශක්තිමත්, වඩාත් සංවිධානාත්මක සහ නීතිරීතිවලට අනුකූල SME සංචාරක ප්‍රජාවක් බිහිවීම තුළින් ව්‍යාපාරිකයන්ට මෙන්ම ශ්‍රී ලංකාවට පැමිණෙන සංචාරකයන්ටද ප්‍රතිලාභ සැලසෙන බව ASMET විශ්වාස කරයි.

එමෙන්ම එවැනි ව්‍යවසායක ප්‍රජාවක් ශ්‍රී ලංකාව ගුණාත්මක හා තිරසාර සංචාරක ගමනාන්තයක් ලෙස ජාත්‍යන්තර වශයෙන් තවදුරටත් ස්ථාපිත කිරීමට වැදගත් දායකත්වයක් ලබාදෙනු ඇතැයි සංගමය අවධාරණය කරයි.