වයස යන්න, ඉලක්කමක් විතරක්ම බව කියන චන්න - අවුරුදු 60ක කොල්ලෙක්

දීපනාත් චන්න පෙරේරා එහෙමත් නැත්නම් අපට වඩාත් සමීප 'චන්න පෙරේරා' ගැන පහුගිය දවස්වල කවුරුත් වැඩියෙන් කතාබහ කරන්න ගත්තා.

පහුගිය දවස්වල කියලා විශේෂ කළාට මොකද, චන්න පෙරේරා කියන්නෙ එදා පටන්ම බබළන තරුවක් තමයි. හරියට ම කිව්වොත්, කාලය ඉගිළුණත් එළිය අඩු නොවන තරුවක්.

ඒ කතාව ඔහුගේ නිර්මාණ කාර්‍යයට සේ ම රූපයටත් අදාළයි.

ඉතින් අර ආරම්භයේ අපි ‘පහුගිය දවස්වල’ කියලා විශේෂ කළේ රූපයට අදාළව.

සමාජ මාධ්‍ය පුරාම, චන්නව කාටත් වඩා විශේෂ වෙලා පේන්න අරන් තිබුණා.

හේතුව ඔහුගේ සදා නොවෙනස් රූපය. එදාටත් වඩා දැන් ඔහු කඩවසම් බව පිළිගන්නම වෙනවා.

රූපයෙන් එහාට රංගන ශිල්පියෙක්, අධ්‍යක්ෂවරයෙක් (ටෙලි/ සිනමා), නිෂ්පාදකයෙක්, පිටපත් රචකයෙක් ආදී දක්ෂතා රැසක් කරපින්නා ගත් ඔහු අපූරු දක්ෂයෙක්.

මහත් කතාබහට ලක්වූ "පුංචි වීරයෝ" වීර ළමා කතාව ඔහුගේ නිර්මාණයක්.

ඒ වගේම අංජලිකා, යුගාත්‍රා, කල්පාන්තේ සිහිනයක් සිනමාපටවල නිර්මාණකරු වන්නේත් ඔහුමයි.

දෙවැනිවර නව නිෂ්පාදනයක් සේ තිරගත වුණු "සුජාතා" චිත්‍රපටයෙන් සිනමා රංගනයට පිවිසි ඔහු වඩාත් ජනප්‍රිය වූයේ ටෙලිනාට්‍ය නළුවකු ලෙසින්.

එවකට පුංචි තිරයේ "චන්න - යශෝධා" යුගයක් ද නිර්මාණයව තිබුණා.

රූපය සම්බන්ධව චන්න ගැන අර කිව්ව කතාබහ පැතිරෙන්න අරන් තිබුණෙ, ''60ක් වෙලත් තාම තරුණයි'' කියලා.

හැබැයි එතකොට නම් ඔහුගේ වයස 60ක් නෙවෙයි,,, 59ක්.

හරියටම ඔහුට 60ක් වුණේ ඊයේ (අගෝස්තු 16)

පහතින් දැක්වෙන්නේ, වයස ගැන ඔහු මීට ඉහත 'ධරණී' පුවත්පත සමඟ කළ කතාබහක්...

''හැටක් වුණාට මගේ පෙනුම තරුණයි කියලා කට්ටිය ෆේස්බුක් එකේ විවිධ පෝස්ට් පළකරනවා. මමත් ඒවා බලනවා. සමහරක් ඒවා කියවද්දි මගේ ඇස්වලට කඳුළු ආවා. ඇත්තමයි මට මේ ලැබෙන ආදරේ නම් හිතාගන්න බෑ. මේ වෙලාවේ මමත් ඔවුන්ට හදවතින්ම ආදරෙයි කියලා කියනවා. ඒ වගේම ඔය දෙන ආදරේ වෙනසක් නැතුව ඉදිරියටත් මං බලාපොරොත්තු වෙනවා...''

තමන්ට ලැබෙන ප්‍රතිචාර ගැන චන්න කියන්නේ එහෙම කතාවක්.

රූපය නිසාම ලැබුණු අමතක නොවන සිදුවීම් මහ හුඟක් ඔහු සතුයි...

''දැනට අවුරුදු කීපයකට කලින් මං බහරේන්වල ප්‍රසංගයකට ගියා. ගිගින් වාහනෙන් බහිද්දි තරුණියන් පිරිසක් ඇවිත් එකපාරට මාව වටකරගත්තා. ඒ වගේ දෙයක් මං බලාපොරොත්තු වුණේ නෑ. අන්තිමේ මං ප්‍රසංගය තිබුණු හෝල් එකට ආරක්ෂකයෝ එක්ක ගියේ කරේ තියාගෙන. එදා මට හිතාගන්න බැරිවුණා...''

චන්න පෙරේරා කොහොමද මෙහෙම තරුණ පෙනුම රැකගෙන ඉන්නෙ කියන එක කාටත් ප්‍රශ්නයක්. ඒ ගැන චන්න කියන්නෙ මෙහෙම කතාවක්..

''මම හදවතේ ආදරය පුරවගෙන ඉන්න කෙනෙක්. ඊර්ෂ්‍යාව, වෛරය, ක්‍රෝධය වගේ දේවල් මගේ ගාව නෑ. ඒ වගේමයි අනවශ්‍ය කුණු කන්දල් හිතේ නෑ. හරිම සැහැල්ලුවෙන් ඉන්නේ. එතකොට ඉතින් වයසට යන්නේ නෑ.''