හිටපු ජනාධිපතිවරුන්ගේ හිමිකම් අවලංගු කිරීමේ පනත් කෙටුම්පතට එරෙහිව තවත් පෙත්සම්

හිටපු ජනාධිපතිවරුන්ගේ හිමිකම් අවලංගු කිරීමේ පනත් කෙටුම්පතට එරෙහිව තවත් පෙත්සම් තුනක් ශ්‍රේෂ්ඨාධිකරණයට ඉදිරිපත් කර තිබෙනවා.

සබරගමුව විශ්වවිද්‍යාලයේ කථිකාචාර්ය මහින්ද පතිරණ, හිටපු ජනාධිපති මහින්ද රාජපක්ෂ මහතාගේ මාධ්‍ය ප්‍රකාශක නීතිඥ මනෝජ් ගමගේ සහ නාවික හමුදාවේ හිටපු මාණ්ඩලික ප්‍රධානී එස්. එම්. විජේවික්‍රම යන මහත්වරුන් විසින් මෙම පෙත්සම් ඉදිරිපත් කර ඇත.

එහි වගඋත්තරකරු ලෙස නීතිපතිවරයා නම් කර ඇත.

මෙම පෙත්සම්වලින් කියා සිටින්නේ යෝජිත පනත් කෙටුම්පතේ 1 සිට 4 දක්වා වගන්ති මඟින් ආණ්ඩුක්‍රම ව්‍යවස්ථාව මඟින් සහතික කර ඇති බලය බෙදීමේ සිද්ධාන්තය උල්ලංඝනය වන බවයි.

එමෙන්ම, අදාළ පනත් කෙටුම්පතේ අන්තර්ගත වගන්ති එකක් හෝ කිහිපයක් මඟින් රටේ ස්වෛරීභාවය සහ ජනතා පරමාධිපත්‍යය උල්ලංඝනය වන බවටද පෙත්සම්වල චෝදනා කර ඇත.

සමස්තයක් ලෙස ගත් කල, යෝජිත පනත් කෙටුම්පතේ වගන්ති මඟින් ආණ්ඩුක්‍රම ව්‍යවස්ථාවේ සඳහන් මූලික හරයන් උල්ලංඝනය වන බවත්, ඒ තුළින් 1, 3, 4 වන ව්‍යවස්ථා මෙන්ම 12(1) ව්‍යවස්ථාවේ සඳහන් මූලික මිනිස් අයිතිවාසිකම් උල්ලංඝනය වන බවත් පෙත්සම්කරුවෝ සඳහන් කරනවා.

එමනිසා, මෙම පනත් කෙටුම්පතේ ප්‍රශ්නගත වගන්ති සම්මත කිරීමට නම්, පාර්ලිමේන්තුවේ තුනෙන් දෙකක විශේෂ බහුතර ඡන්දයකින් එය අනුමත වී, ජනමත විචාරණයකින්ද අනුමත විය යුතු බවට නියෝගයක් නිකුත් කරන ලෙස පෙත්සම්කරුවෝ ශ්‍රේෂ්ඨාධිකරණයෙන් ඉල්ලා සිටිනවා

මීට පෙර ශ්‍රී ලංකා පොදුජන පෙරමුණේ පාලක ලේකම් රේණුක පෙරේරා සහ තවත් පුරවැසියන් දෙදෙනෙකු විසින්ද මෙම පනත් කෙටුම්පතට එරෙහිව පෙත්සම් තුනක් ඉදිරිපත් කරනු ලැබුවා.