ගුවන්විදුලියේ එක් මැදිරියක්, හෙට සිට ජාතියේ යශෝරාවය ආචාර්ය නන්දා මාලිනිය නමින් නම් කෙරේ

ජාතියේ යශෝරාවය මැයෙන් සම්භාවනාවට පාත්‍රව සිටින, ප්‍රවීණ ගායන ශිල්පිනි ආචාර්ය නන්දා මාලිනිය වෙනුවෙන්, හෙට (22) ශ්‍රී ලංකා ගුවන්විදුලි සංස්ථාවේ සුවිශේෂී කටයුත්තක් සූදානම් කර තිබෙනවා.

හෙට පෙ.ව 8.15ට ආරම්භ වීමට නියමිත මෙම සුවිශේෂී අවස්ථාව නම්කර ඇත්තේ, ''ප්‍රණාම'' මැයෙනි.

එතුමියගේ මෙහෙවර අගමින් පිදෙන මෙම උත්තමාචාරයට සමගාමීව, ශ්‍රී ලංකා ගුවන්විදුලි සංස්ථාවේ 9 වැනි මැදිරිය ද ආචාර්ය නන්දා මාලිනි මැදිරිය නමින් හෙට සිට නම් කෙරෙනු ඇති.

මෙම සුවිශේෂී අවස්ථාවට අග්‍රාමාත්‍ය ආචාර්ය හරිනි අමරසූරිය ද සහභාගි වීමට නියමිතය.

ශ්‍රී ලංකා ගුවන්විදුලි සංස්ථාවේ සභාපති උදිත ගයාෂාන් ගුණසේකර මහතා සඳහන් කළේ, ආචාර්ය නන්දා මාලිනි මැදිරිය විවෘත කිරීම මෙන්ම ඇයගේ ඡායාරූපයක් ද මෙහිදී නිරාවරණය කෙරෙන බවයි.

එමෙන්ම ඇය වෙනුවෙන් තිළිණ ප්‍රදානයක් ද සිදුකෙරෙනු ඇති.

ලාංකේය සංගීතය වෙනුවෙන්, අනුපමේය දායකත්වයක් සැපයූ ආචාර්ය නන්දා මාලිනියගේ 82 වන ජන්ම දිනය ද අනිද්දා (අගෝස්තු 23) දිනයට යෙදී තිබේ.