රොනාල්ඩෝ සිය සහකාරිය වූ ජෝර්ජිනා සමඟ විවාහ ගිවිස ගනී

සුපිරි පාපන්දු ක්‍රීඩක ක්‍රිස්ටියානෝ රොනාල්ඩෝ ඔහුගේ දිගුකාලීන සහකාරිය වන ජෝර්ජියානා රොඩ්‍රිගස් සමඟ විවාහ ගිවිසගෙන තිබේ.

වසර 09ක දීර්ඝ සබඳතාවකින් පසු ඔවුන් මෙලෙස විවාහ ගිවිස ගෙන ඇත.

ජෝර්ජියානා ස්පාඤ්ඤ භාෂාවෙන් “ඔව් මම කරනවා. මේකෙත් මගේ මුළු ජීවිත කාලය පුරාම” යනුවෙන් ලියා ඇති විශාල මුද්දක පින්තූරයක් සමඟ ඇයගේ සමාජ මාධ්‍යවල මේ බව නිවේදනය කර තිබුණි. කෙසේ නමුත් මේ සම්බන්ධයෙන් වැඩිදුර විස්තර ඇය බෙදාගෙන නොමැත.

එසේම ඉන්ස්ටග්‍රෑම් හි වැඩිපුරම අනුගමනය කරන පුද්ගලයා වන 40 හැවිරිදි රොනාල්ඩෝ තවමත් ඔවුන්ගේ විවාහ ගිවිස ගැනීම පිළිබඳව අදහස් දක්වා නොමැත.

රොඩ්‍රිගස් සේවය කළ මැඩ්රිඩ් හි වෙළෙඳසැලක දී මුණගැසීමෙන් පසු මෙම යුවළ වසර නවයක් එකට සිට තිබුණි. රොනාල්ඩෝ ඒ වන විට ස්පාඤ්ඤ පාපන්දු සමාජයක් වන රියල් මැඩ්රිඩ් හි ක්‍රීඩා කරමින් සිටියේය.