''රඟපානවා කියන එක ලේසි නැහැ. ඒක හරිම අමාරු දෙයක්... ඒ තරම් අමාරු ජොබ් එකක් මම දැකලා නැහැ'' - සාරා අබේවර්ධන

සාරා අබේවර්ධන කියූ සැනින් ඔබට මතකයට නැඟෙන්නේ, දක්ෂ නර්තන ශිල්පිනියක් බවට සැක නෑ.

ඒ තරමට සාරා කියන නමත් එක්ක නර්තනය අපූරුවට බැඳිලා තියෙන්නෙ.

ඈ දක්ෂ, ජනප්‍රිය නර්තන ශිල්පිනියක් බව අවිවාදාත්මකයි.

නර්තනය තුළ දස්කම් පාන සාරා, නුදුරේදීම සිනමා තිරයෙනුත් ඔබ හමුවට පැමිණීමට නියමිතයි.

ඒ, එළැඹෙන 14 වැනිදා සිට තිරගත වීමට නියමිත අනූෂ සංජීව එදිරිමුණි අධ්‍යක්ෂණය කරන ලද ''මදර් ලංකා'' සිනමා පටය තුළින්.

''ඇත්තටම රඟපාන්න ආරාධනා ගොඩක් එනවා. මම නර්තනයට එන්න කලින් ඉඳලා රඟපෑමට ආරාධනා ලැබුණා. හැබැයි මම හිතනවා මගේ දක්ෂතාවය එතැන නෙමෙයි තියෙන්නේ කියලා. මගේ ගෙදරින් ඒ විෂයට එච්චර කැමැත්තක් නැහැ. අනික මමත් පෞද්ගලිකව ඒ වැඩේට එච්චර කැමැත්තක් නැහැ.

අනූෂ සංජීව එදිරිමුණි අධ්‍යක්ණය කරනු ලබන මදර් ලංකා චිත්‍රපටයේ රඟපෑවා. එළැඹෙන 14 වැනිදා ඉඳලා ඒ චිත්‍රපටය තිරගත වෙනවා. ඔය අතරේ මම ගොඩක් චිත්‍රපටවල නර්තන වින්‍යාසය කරලා තියෙනවා. ඉතිං මම ආශා කරන්නේ තිරයෙන් පිටිපස්සේ තියෙන දේවල් හදන්න මිස තිරයට ඉස්සරහට ගිහිල්ලා රඟපාන්න නෙමෙයි. නමුත් මම මදර් ලංකා චිත්‍රපටයේ රඟපෑ චරිතය හරි ආශාවෙන් රඟපෑවා...

මම පොඩි චරිතයක් තමයි රඟපාන්නේ. මම හිතනවා මදර් ලංකා බලන්න ගියොත් කට්ටියට මගේ රඟපෑම ගැන බලාගන්න පුළුවන් වේවි කියලා. ඒක ටිකක් වෙනස්ම කතාවක්. ඇත්තටම මදර් ලංකා කියන්නේ පවුලේ චිත්‍රපටයක්...''

මදර් ලංකා, සාරාගේ පළමු සිනමා රංගන අත්දැකීම වීමත් විශේෂයි...

''මදර් ලංකා මගේ පළමු රංගනය. හැබැයි මම මීට කලින් රොඩ්නි වර්ණකුල වගේ කට්ටියත් එක්ක වේදිකා නාට්‍යවල වැඩකරලා තියෙනවා. නාට්‍යවලත් රඟපාලා තියෙනවා. හැබැයි මම හිතුවේ නැහැ මම තිරය ඉදිරියට ගිහිල්ලා රංගනයෙන් දායකවෙලා ඒක වෘත්තිය කරගන්න ඕනෑ කියලා...''

වෘත්තීමය නර්තන ශිල්පිනියක් වන සාරා, රංගනයේ අත්දැකීම් ගැනත් මෙයාකාරයෙන් විස්තර කර තිබුණා....

''රඟපානවා කියන එක ලේසි නැහැ. ඒක හරිම අමාරු දෙයක්. අපි හැමෝම හිතනවා රඟපානකොට ඒක හරි ලේසි දෙයක් කියලා. අපි සමහර වෙලාවට නළු නිළියන් හෑල්ලුවට ලක්කරනවා. නමුත් ඒ තරම් අමාරු ජොබ් එකක් මම දැකලා නැහැ. මට ලැබුණ පොඩි චරිතය කරන්න ගිහිල්ලා මම මහන්සිවුණ විදිහ මම දන්නවානේ....''

උපුටාගැනීම : දිනේෂ් විතාන | මීවිත