'ක්ලීන් ශ්‍රී ලංකා' 2026 ක්‍රියාකාරී සැලැස්ම ජනපති ප්‍රධානත්වයෙන් සමාලෝචනය කෙරේ

'ක්ලීන් ශ්‍රී ලංකා' (Clean Sri Lanka) වැඩසටහනේ 2026 වර්ෂය සඳහා වන ක්‍රියාකාරී සැලැස්ම සහ පසුගිය වර්ෂයේ ප්‍රගතිය පිළිබඳ විශේෂ සාකච්ඡාවක් ජනාධිපති අනුර කුමාර දිසානායක මහතාගේ ප්‍රධානත්වයෙන් ජනාධිපති ලේකම් කාර්යාලයේදී අද (17) පෙරවරුවේ පැවැත්විණි.

'ක්ලීන් ශ්‍රී ලංකා' (Clean Sri Lanka) වැඩසටහන යටතේ 2026 වර්ෂයේදී ක්‍රියාත්මක කිරීමට යෝජිත ව්‍යාපෘති ජනතාවට වඩාත් සමීප වන අයුරින් සංවිධානය විය යුතු ආකාරය පිළිබඳව මෙහිදී දීර්ඝ වශයෙන් සාකච්ඡාවට ලක් විය.

හුදෙක් රාජ්‍ය ව්‍යාපෘතියකට පමණක් සීමා නොවී, මහජනතාවට වඩාත් සමීප ව්‍යාපෘති තුළින් 'ක්ලීන් ශ්‍රී ලංකා' (Clean Sri Lanka) වැඩසටහන තවදුරටත් ප්‍රචලිත කිරීමේ අවශ්‍යතාව ජනාධිපතිවරයා විසින් මෙහිදී අවධාරණය කරන ලදී.

තවද පසුගිය වසරේ ප්‍රගතිය මෙහිදී සමාලෝචනය කරන ලද අතර ඉදිරි වර්ෂය සඳහා වන ඉලක්ක සපුරා ගැනීම සඳහා අදාළ පාර්ශව සම්බන්ධ කරගනිමින් කටයුතු කරන ආකාරය පිළිබඳවද නිලධාරීහු කරුණු පැහැදිලි කළහ.

ජනාධිපති ලේකම් ආචාර්ය නන්දික සනත් කුමානායක, ක්ලීන් ශ්‍රී ලංකා ලේකම් කාර්යාලයේ කැඳවුම්කරු, ජනාධිපති ජ්‍යෙෂ්ඨ අතිරේක ලේකම් රසල් අපොන්සු, අතිරේක ලේකම් එස්.පී.සී සුගීශ්වර යන මහත්වරු, ක්ලීන් ශ්‍රී ලංකා කාර්ය සාධන බලකායේ සාමාජිකයෝ සහ ක්ලීන් ශ්‍රී ලංකා ලේකම් කාර්යාලයේ ඉහළ නිලධාරීහු පිරිසක් මෙම අවස්ථාවට සහභාගී වූහ.