ප්‍රවීණ ඉන්දීය නළු ධර්මේන්ද්‍ර මියගොස් ඇතැයි පළවන පුවත් අසත්‍ය බවට, දියණිය ඊෂා ඩියෝල්ගෙන් ප්‍රකාශයක්

තම පියා මියගොස් ඇති බවට මාධ්‍යවල පළවන පුවත් අසත්‍ය බව බොලිවුඩයේ ප්‍රවීණ නළු ධර්මේන්ද්‍ර ඩියෝල්ගේ, දියණිය ඊෂා ඩියෝල් instagram ඔස්සේ සටහනක් තබමින් සඳහන් කර තිබෙනවා.

ඇය සිය සටහනින් අවධාරණය කර ඇත්තේ, තම පියා සුවය ලබමින් සිටින බවත් අසත්‍ය තොරතුරු පැතිරවීමෙන් වළකින ලෙසයි.

''මාධ්‍ය අධික වේගයෙන් අසත්‍ය ප්‍රවෘත්ති පතුරුවන බව පෙනේ. මගේ පියා ස්ථාවරව හා සුවය ලබමින් සිටියි. අපගේ පවුලට පෞද්ගලිකත්වය ලබා දෙන ලෙස අපි සැමගෙන් ඉල්ලා සිටිමු. පියාගේ ඉක්මන් සුවය සඳහා ඔබගේ යාච්ඤාවලට ස්තූතියි” යන්නෙන් ඇය වැඩිදුරටත් සඳහන් කර තිබේ.

ධර්මේන්ද්‍ර ඩියෝල්, ඊයේ පෙරවරුවේ අසනීප තත්ත්වයක් හේතුවෙන් රෝහල්ගත කර ඇති අතර, පසුව ඔහු මියගොස් ඇති බවට ඇතැම් ඉන්දීය මාධ්‍ය තොරතුරු වාර්තා කරන ලදී.

'ඉන්දියානු චිත්‍රපට කර්මාන්තයේ යුගයක් අවසන් වී ඇත' මැයෙන් ආරක්ෂක අමාත්‍ය රාජ්නාත් සිං, ලේඛක ජාවෙඩ් අක්තාර් යන අයද ධර්මේන්ද්‍ර වෙනුවෙන් සමාජ මාධ්‍ය සටහන් එක්කිරීමෙන් පසු ඊෂා ඩියෝල් සිය පියා පිළිබඳව පැතිරෙන පුවත් සත්‍ය නොවන බව තහවුරු කිරීමට කටයුතු කර තිබේ.

එමෙන්ම ධර්මේන්ද්‍රගේ පුත්, භාරතීය ජනතා පක්ෂ පාර්ලිමේන්තු මන්ත්‍රී සනී ඩියෝල්ගේ නියෝජිතයින් ද ධර්මේන්ද්‍රගේ සෞඛ්‍ය තත්ත්වය පිළිබඳව යාවත්කාලීන කිරීම් සිදුකර තිබිණ.

ඒ, "ධර්මේන්ද්‍ර මහතා ස්ථාවරව වෛද්‍ය නිරීක්ෂණයන් යටතේ සිටී. කරුණාකර ඔහුගේ සෞඛ්‍යය පිළිබඳ අසත්‍ය කටකතා පතුරුවන්න එපා. ඔහුගේ ඉක්මන් සුවය සඳහා යාච්ඤා කරන ලෙසත් පවුලේ පෞද්ගලිකත්වයට ඇති අයිතියට ගරු කරන ලෙසත් සැමගෙන් ඉල්ලා සිටිමු" යනුවෙන් සඳහන් කරමින්.

රෝහල්ගතව සිටින ධර්මේන්ද්‍රගේ සුවදුක් විමසීම සඳහා සල්මන් ඛාන්, ෂාරුක් ඛාන්, ගෝවින්ද ඇතුළු පිරිස ද සහභාගීව සිටින අන්දම ඉන්දීය මාධ්‍ය වාර්තා කර තිබිණ.