''මගේ කලා ජීවිතයේ මං ලබපු, පළමු හොඳම නිළිය සම්මානය'' - ජනප්‍රිය රංගන ශිල්පිනි දිනක්ෂි ප්‍රියසාද්

'SIGNIS' ටෙලි සිනමා සම්මාන උළෙල ඊයේ (01) රාත්‍රියේ අති උත්කර්ෂවත් අන්දමින් පැවැත්වුණා.

මෙවර සම්මාන උළෙලේ ඇගයීමට ලක්වුණේ, 2023 සහ 2024 වසරට අදාළ ටෙලි නාට්‍ය සහ චිත්‍රපට.

ඒ අනුව, ජනප්‍රිය රංගන ශිල්පිනි දිනක්ෂි ප්‍රියසාද් 2024 වසරේ විශිෂ්ටතම රංගන ශිල්පිනිය ලෙස සම්මානනීය වුණා. ඒ, ඇය මෙතෙක් රඟපෑ චරිත අතර මහත් කතාබහට ලක්වුණු 'TAKE CARE' ටෙලි නාට්‍යයේ 'මේනකා' චරිතය වෙනුවෙන්.

දිනක්ෂිට මේ සම්මානය වඩාත් විශේෂ වන්නේ, ප්‍රධාන පෙළේ සම්මාන උළෙලකදී ඇය ලද පළමු හොඳම නිළිය සම්මානය මෙය වීම නිසාවෙන්.

එලෙස ලද සම්මානයේ සතුට, දිනක්ෂි මෙයාකාරයෙන් බෙදාගෙන තිබුණා.

''SIGNIS සම්මාන උලෙළේ 2024 විශිෂ්ටතම රංගන ශිල්පිනිය ලෙස TAKE CARE ටෙලි නාට්‍යයේ මේනකා වෙනුවෙන් සම්මානය ලැබුනා... මේ සම්මානය මට ගොඩක්ම වටින්නෙ ප්‍රධාන පෙලේ සම්මාන උත්සවයකදී, මගේ කලා ජීවිතයේ මං ලබපු පළමු හොඳම නිළිය සම්මානය මෙය වීමයි... ඒ වගේම මාත් සමඟින්ම නිර්දේශ වුනු තරින්දි නංගිටත් දිනිතිටත් ආදරණීය සුබ පැතුම්...

මුලින්ම මගේ රංගන ජීවිතය වෙනස් කරමින් මට මේ අවස්ථාව ලබා දුන් අනුෂ්ක මල්ලිට මගේ ආදරය.. ගෞරවය සහ ස්තූතියි... මේක අයිති ඔයාට.. මටත් වඩා... ඊටත් වඩා සතුටුයි ඔයාටත් ඔයාගේ පළමු හොඳම අධ්‍යක්ෂට හිමි සම්මානය දිනා ගන්න ලැබුනු එකට.

මගේ Take Care කණ්ඩායමේ සියලු ශිල්පීන් සහ කාර්මික ශිල්පීන්ටත්... මටත් වඩා මගේ බර කරට ගන්න සාරංග ඇතුලු මගේ පවුලේ සියලුම දෙනාටත්... TAKE CARE නරඹමින් ඒ ගැන වැඩි වැඩියෙන් කතා කරපු අපේ ආදරණීය ප්‍රේක්ෂකයන් වන ඔයාලා හැමෝටමත් බොහොම ස්තූතියි.

හැමදාම වගේම ඉස්සරහටත් මගේ ලොකුම හයිය ඔයාලා... ආදරෙයි''