ඉම්රාන් ඛාන් ගැන පැතිර යන කටකතා, අඩියාලා බන්ධනාගාරයෙන් ප්‍රතික්ෂේප කරයි

හිටපු පාකිස්ථාන අගමැති, ටෙහ්රීක්-ඊ-ඉන්සාෆ් (PTI) නිර්මාතෘ ඉම්රාන් ඛාන් පිළිබඳව පැතිර යන කටකතා, අඩියාලා බන්ධනාගාරයෙන් ප්‍රතික්ෂේප කර තිබෙනවා.

ඒ, ඉම්රාන් ඛාන් සිරගෙදරදී මියගොස් ඇති බවට කටකතා පැතිර යන මධ්‍යයේ, ඔහුව හමුවීමට අවසර ඉල්ලා සිටි තමන්ට පොලීසිය විසින් ම්ලේච්ඡ අන්දමින් පහරදුන් බවට ඉම්රාන් ඛාන්ගේ සහෝදරියන් තිදෙනා චෝදනා කිරීමත් සමඟයි.

එමෙන්ම හිටපු අගමැතිවරයා අඩියාලා බන්ධනාගාරයෙන් ඉවත්කර ඇති බවටත් කටකතා පැතිරෙන බවට විදෙස් මාධ්‍ය තොරතුරු වාර්තා කළා.

මේ සම්බන්ධයෙන් අඩියාලා බන්ධනාගාරය නිවේදනය කර ඇත්තේ, ඉම්රාන් ඛාන් බන්ධනාගාරය තුළ ම සිටින බවත් ඔහු හොඳ සෞඛ්‍ය තත්වයෙන් පසුවන බවයි.

සමාජ මාධ්‍යවල පළවන වාර්තා සේ ම ඉම්රාන් ඛාන් සිරගෙදරදී මියගොස් ඇතැයි කටකතා පළවන බවට වූ මාධ්‍ය වාර්තාවන් ද පදනම් විරහිත බවයි ඔවුන් අවධාරණය කර ඇත්තේ.

ඒ අනුව PTI ප්‍රධානියාට අවශ්‍ය කරන්නාවූ වෛද්‍ය ප්‍රතිකාර දිගටම ලැබෙන බවට මහජනතාවට සහතික වන බවටත් බන්ධනාගාරයෙන් සඳහන් කර තිබෙනවා.

ඉම්රාන් ඛාන් හමුවීමට අවසර ඉල්ලා සිටි තමන්ට පොලීසිය විසින් ම්ලේච්ඡ අන්දමින් පහරදුන් බවට ඉම්රාන් ඛාන්ගේ සහෝදරියන් තිදෙනා චෝදනා කර තිබුණා. ඒ, ඔහු සිරගෙදරදී ම මියගොස් ඇති බවට පැතිර යන කටකතා මධ්‍යයේ යි.

මෙලෙස චෝදනා කර තිබුණේ ඉම්රාන් ඛාන්ගේ සහෝදරියන් වන නොරීන් ඛාන්, අලීමා ඛාන් සහ උස්මා ඛාන් යන අයයි.

ඔවුන් වැඩිදුරටත් සඳහන් කරන්නේ මෙම සතියේ රාවල්පින්ඩිහි අඩියාලා බන්ධනාගාරය (Rawalpindi’s Adiala Jail) ඉදිරිපිට රැස්ව සිටි අවස්ථාවේදී, තමන්ට සහ පාකිස්ථාන තෙහ්රීක්-ඊ-ඉන්සාෆ් (PTI) පක්ෂයේ ආධාරකරුවන්ට පොලිසිය පහර දුන් බවයි.

හිටපු පාකිස්ථාන අගමැති ඉම්රාන් ඛාන්, 2023 සිට අඩියාලා බන්ධනාගාරයේ රඳවා සිටියි.

NDTV ඇතුළු විදෙස් මාධ්‍ය වාර්තාවන්ට අනුව, සති තුනකට වැඩි කාලයක් තිස්සේ තම සහෝදරයා හමුවීමට අවසර දී නොමැති බවට ඛාන්ගේ සහෝදරියන් චෝදනා කර තිබේ.

මේ හේතුවෙන් ඉම්රාන් ඛාන්ගේ සහෝදරියන් සහ PTI ආධාරකරුවන් විසින් අඩියාලා බන්ධනාගාරය ඉදිරිපිට විරෝධතා පවත්වා ඇත.

PTI වාර්තාවන්ට අනුව, ඛාන්ගේ සහෝදරියන් සහ ආධාරකරුවන් බන්ධනාගාරයෙන් පිටත වාඩි වී සිටියදී පොලිස් නිලධාරීන් ඔවුන්ට කුරිරු ලෙස පහර දී තිබේ.

ඒ, ඔවුන් ඉම්රාන් ඛාන් හමුවීමට උත්සාහ කිරීම අපරාධයක් බව හඟවමින් බව සඳහන්.

මෙයාකාරයෙන් එල්ල වූ පහරදීම් සම්බන්ධයෙන්, අපක්ෂපාතී පරීක්ෂණයක් පවත්වන ලෙසයි PTI වෙතින් වැඩිදුරටත් අවධාරණය කර ඇත්තේ.

ඛාන්ගේ සහෝදරියන්ගෙන් ලිපියක් :

පන්ජාබ් පොලිස් ප්‍රධානී උස්මාන් අන්වර් වෙත ලිපියක් යවමින්, ඛාන්ගේ සහෝදරියන් සඳහන් කර ඇත්තේ කිසිදු ප්‍රකෝපකාරී හැසිරීමකින් තොරවම පොලිස් නිලධාරීන් පහරදීම් සිදුකළ බවයි.

"ඔහුගේ සෞඛ්‍ය තත්ත්වය පිළිබඳ කනස්සල්ල නිසා අපි සාමකාමීව විරෝධතා දැක්වූවා. අපි මාර්ග අවහිර කළේවත්, මහජන ගමනාගමනයට බාධා කළේවත්, නීති විරෝධී හැසිරීමක නිරත වුණේවත් නැහැ. එහෙත්, අනතුරු ඇඟවීමකින් හෝ ප්‍රකෝප කිරීමකින් තොරව, ප්‍රදේශයේ වීදි ලාම්පු හදිසියේම නිවා දමා, හිතාමතාම එම ස්ථානය අන්ධකාරයට ඇද දැමුවා. ඉන්පසු සිදු වූයේ පන්ජාබ් පොලිස් නිලධාරීන් විසින් ම්ලේච්ඡ හා සැලසුම් සහගත පහරදීමක්" යනුවෙන් නොරීන් සඳහන් කර තිබේ.

ඒ අනුව මෙම කුරිරු ප්‍රහාරයට සම්බන්ධ සියලුම පොලිස් නිලධාරීන්ට එරෙහිව වහාම නඩු පැවරිය යුතු බවයි ඛාන්ගේ සහෝදරියන් පන්ජාබ් පොලිස්පතිවරයාගෙන් ඉල්ලා සිටින්නේ.

ඉම්රාන් ඛාන්ගේ සිරගත කිරීම :

PTI හි ප්‍රධානි ඉම්රාන් ඛාන්, 2023 අගෝස්තු මාසයේ සිට බහුවිධ නඩු සම්බන්ධයෙන් සිරගතව සිටී.

ඔහුගේ මරණය පිළිබඳ කටකතා ස්වරූපය ගත් වාර්තා සමාජ මාධ්‍යවල සංසරණය වෙමින් තිබියදීත්, මාසයකට වැඩි කාලයක් තිස්සේ ඔහුව හමුවීම සඳහා ප්‍රකාශ නොකළ තහනමක් පනවා ඇති බව සඳහන්.

PTI වාර්තාවන්ට අනුව ඛාන්, සම්පූර්ණයෙන්ම හුදකලා සිරකඳවුරක පසුවේ.

ඔහුගේ නීති කණ්ඩායමට සම්බන්ධ නීතිඥයෙකු ඉන්දීය මාධ්‍යය හමුවේ සඳහන් කර ඇත්තේ පොත්පත්, අත්‍යවශ්‍ය භාණ්ඩ සහ ඔහුගේ නීතිඥයින් වෙත පවා ප්‍රවේශය අවහිර කර ඇති බවයි.

කයිබර්-පක්තුන්ක්වා මහ ඇමති සොහෙයිල් අෆ්රිඩිට පවා ඛාන් හමුවීමට අවසර නොලැබි බව සඳහන්.

ආරක්ෂක අමාත්‍ය කවාජා අසිෆ් :

ඉම්රාන් ඛාන් සිරගතව ගෙවන ජීවිතය පිළිබඳව ආරක්ෂක අමාත්‍ය කවාජා අසිෆ් ද තොරතුරු හෙළිකර තිබෙනවා.

ඒ, ඔහු නිදහස්ව සිටි කාලයට සාපේක්ෂව බන්ධනාගාරයේ යහපත්ව පසුවන බවටයි.

ඒ අනුව ඔහුට ලබාදෙන ආහාර, තරු පහේ හෝටලයක පවා ලබා ගත නොහැකි බවත්, ඔහුට රූපවාහිනිය නැරඹීමට ද අවස්ථාව සලසා දී ඇති බවත් සඳහන්. ඒ ඕනෑම නාලිකාවක් නැරඹිය හැකි වන ලෙසයි.

එමෙන්ම ඉම්රාන් ඛාන් වෙනුවෙන් ව්‍යායාම යන්ත්‍ර ද තිබෙන බවත් නිදාගැනීම සඳහා ද සුවපහසු මෙට්ටයක් ලබාදී ඇති බවයි කවාජා අසිෆ් වැඩිදුරටත් සඳහන් කර ඇත්තේ.