'British Airways' වසර 10 කට පසුව ශ්‍රී ලංකාව වෙත ගුවන් මෙහෙයුම් අරඹයි

වසර 10කට පසු බ්‍රිතාන්‍ය ගුවන් සේවය (British Airways) ශ්‍රී ලංකාව වෙත ගුවන් ගමන් යළි ආරම්භ කර ඇත.

එහි පළමු ගුවන් යානය අද (24) කටුනායක බණ්ඩාරනායක ජාත්‍යන්තර ගුවන්තොටුපළට පැමිණ තිබේ.

ලන්ඩන් ගැට්වික් ගුවන්තොටුපළේ සිට BA2045 දරන ගුවන් ගමන යටතේ පැමිණි Boeing 777-200ER වර්ගයේ ගුවන් යානය උදෑසන කොළඹට ළඟා වීමත් සමඟ බ්‍රිතාන්‍ය ගුවන් සේවයේ ශ්‍රී ලංකා මෙහෙයුම් යළි ආරම්භ කිරීම සනිටුහන් විය.

නව ගුවන් සේවය යටතේ ලන්ඩන් ගැට්වික් සහ කොළඹ අතර සතියකට ගුවන් ගමන් වාර තුනක් ක්‍රියාත්මක කිරීමට නියමිතය.

මෙම සේවාව බ්‍රිතාන්‍යයේ සිට ශ්‍රී ලංකාවට පැමිණෙන සංචාරකයන්ට මෙන්ම දෙරට අතර ගමන් කරන ව්‍යාපාරිකයන්ට ද පහසුකම් සැලසීමට අපේක්ෂා කෙරේ.

එක්සත් රාජධානිය ශ්‍රී ලංකාවේ ප්‍රධාන සංචාරක වෙළෙඳපොළක් වන බැවින්, බ්‍රිතාන්‍ය ගුවන් සේවයේ නැවත පැමිණීම මෙරට සංචාරක කර්මාන්තයේ වර්ධනයට දායක වනු ඇතැයි අපේක්ෂා කෙරේ.

එමෙන්ම දෙරට අතර වෙළෙඳාම, ව්‍යාපාරික සබඳතා සහ ජනතාව අතර සබඳතා ශක්තිමත් කිරීමට ද මෙම ගුවන් සේවය ඉවහල් වනු ඇත.

ශ්‍රී ලංකාවේ හේලීස් සමූහ ව්‍යාපාරයට අයත් 'Advantis Aviation Services' ආයතනය, බ්‍රිතාන්‍ය ගුවන් සේවයේ මෙරට ප්‍රධාන විකුණුම් නියෝජිතයා (GSA) ලෙස කටයුතු කරයි.

බ්‍රිතාන්‍ය ගුවන් සේවය සඳහන් කර ඇති පරිදි, කොළඹ මාර්ගයේ ගුවන් ගමන් ශීත ඍතු කාලසටහනට අදාළ සෘතුමය සේවාවක් ලෙස ක්‍රියාත්මක වේ.

එහිදී මගීන්ට Economy, Premium Economy සහ Business Class යන ගමන් පන්ති තුනෙන්ම ගමන් කිරීමේ අවස්ථාව හිමි වේ.

මෙම ගුවන් ගමන් යළි ආරම්භ කිරීමත් සමඟ ශ්‍රී ලංකාව සහ එක්සත් රාජධානිය අතර ගුවන් සම්බන්ධතා පුළුල් වන අතර, මෙරට සංචාරක හා ගුවන් සේවා ක්ෂේත්‍රයට නව අවස්ථා රැසක් උදා වනු ඇතැයි අපේක්ෂා කෙරේ.