Watch : ''නිසි ඖෂධ ලබාදීලා එතුමාගේ සෞඛ්‍ය තත්ත්වය රැකගන්න ඕනි'' - රනිල්ගේ සෞඛ්‍ය තත්ත්වය ගැන සජිත් කියයි

හිටපු ජනාධිපති රනිල් වික්‍රමසිංහ මහතා මේ වන විට හොඳින් පසුවන බව විපක්ෂ නායක, සජිත් ප්‍රේමදාස මහතා පවසනවා.

විපක්ෂ නායකවරයා මේ බව සඳහන් කළේ අද (23) උදෑසන රනිල් වික්‍රමසිංහ මහතාගේ සුවදුක් විමසීම සඳහා බන්ධනාගාර රෝහල වෙත ගොස්, ඉන් අනතුරුව මාධ්‍ය හමුවේ අදහස් දක්වමින්.

අපරාධ පරීක්ෂණ දෙපාර්තමේන්තුව මඟින් අත්අඩංගුවට ගෙන අධිකරණයට ඉදිරිපත් කළ හිටපු ජනාධිපති රනිල් වික්‍රමසිංහ මහතා ලබන 26 වනදා දක්වා රක්ෂිත බන්ධනාගාර ගත කරන ලෙස ඊයේ (22) කොළඹ කොටුව මහෙස්ත්‍රාත් අධිකරණය නියෝග කළා.

එලෙස රක්ෂිත බන්ධනාගාර ගත කෙරුණු හිටපු ජනපතිවරයා රුධිර පීඩනය ඉහළ යාම සහ සීනි මට්ටම ඉහළ යාම හේතුවෙන් වෛද්‍ය උපදෙස් මත බන්ධනාගාර රෝහලට ඇතුළත් කෙරුණා.

ඒ අනුව එතුමන්ගේ සුවදුක් විමසා බැලීම සඳහා අද උදෑසන බන්ධනාගාර රෝහල වෙත පැමිණි සජිත් ප්‍රේමදාස මහතා මාධ්‍ය හමුවේ අදහස් දක්වමින් සඳහන් කර සිටියේ තමන් රනිල් වික්‍රමසිංහ මහතාව හමුවුණු බවත් එතුමන් හොඳින් පසුවන බවයි.

එමෙන්ම හිටපු ජනපතිවරයාගේ සෞඛ්‍ය තත්ත්වය ආරක්ෂා කරගත යුතු බවත් ඒ අනුව නිසි ඖෂධ සහ ප්‍රතිකාර ලබාදිය යුතු බවයි විපක්ෂ නායකවරයා වැඩිදුරටත් සඳහන් කළේ.

මේ අතර යුක්තිය පසිඳලීමේ ක්‍රියාවලිය තුළ තුන්වන පාර්ශවයක මැදිහත්වීමක්, එනම් නීතියේ අවසන් ප්‍රතිඵලය සමාජ මාධ්‍යකරුවෙකු තීරණය කිරීම තුළ ගැටළු සහගත බවක් ඇති බවත් සජිත් ප්‍රේමදාස මහතා මෙහිදී පෙන්වා දුන්නා.

ප්‍රජාතන්ත්‍රවාදය සුරක්ෂිත වීමට නම් එවැනි අන්දමේ ක්‍රියාවන් සිදුනොවිය යුතු බවයි විපක්ෂ නායකවරයා අවධාරණය කළේ.