හෝර්මුස් සමුද්‍ර සන්ධියේ ටෝගෝ ධජය සහිත තෙල් නැවකට ප්‍රහාරයක්

ඉරාන විප්ලවීය ආරක්ෂක බලකාය (IRGC) විසින් හෝර්මුස් සමුද්‍ර සන්ධිය හරහා “නීති විරෝධී ලෙස ගමන් කිරීමට” උත්සාහ කළ බවට චෝදනා කරන ටෝගෝ ධජය සහිත තෙල් ප්‍රවාහන නෞකාවකට ප්‍රහාරයක් එල්ල කළ බව ඉරාන රාජ්‍ය මාධ්‍ය වාර්තා කරයි.

ඊයේ රාත්‍රියේ මෙම නෞකාවට ප්‍රහාරය එල්ල කළ බවත්, ප්‍රහාරයෙන් අනතුරුව නෞකාවේ ගින්නක් හටගෙන එය නතර කිරීමට හැකි වූ බවත් IRGC නාවික හමුදාව පවසයි.

එම නෞකාව ඇමෙරිකානු හමුදාව විසින් “පෙළඹවීමකට හා නොමඟ යැවීමකට” ලක් කිරීමෙන් අනතුරුව හෝර්මුස් සමුද්‍ර සන්ධිය හරහා ගමන් කිරීමට උත්සාහ කළ බවට IRGC නාවික හමුදාව චෝදනා කරයි.

උපායමාර්ගික වශයෙන් අතිශය වැදගත් මෙම සමුද්‍ර මාර්ගය සම්බන්ධයෙන් තමන් තවදුරටත් පාලනය පවත්වාගෙන යන බවත්, “කිසිදු ආක්‍රමණිකයෙකුට එය හරහා ගමන් කිරීමට ඉඩ නොදෙන” බවත් IRGC නාවික හමුදාව ප්‍රකාශ කරයි.

IRGC නාවික හමුදාව රාජ්‍ය මාධ්‍ය ඔස්සේ නිකුත් කළ නිවේදනයක සඳහන් කර ඇත්තේ, “හෝර්මුස් සමුද්‍ර සන්ධිය හරහා නීති විරෝධී ලෙස ගමන් කිරීමෙන් කිසිදු ප්‍රතිඵලයක් අත් නොවන අතර, එම නෞකාව විනාශ වීම පමණක් සිදුවනු ඇත” යනුවෙනි.

මේ අතර, එක්සත් රාජධානියේ නාවික වෙළෙඳ මෙහෙයුම් ආයතනය (UKMTO) සඳහන් කළේ හෝර්මුස් සමුද්‍ර සන්ධියේදී තෙල් ප්‍රවාහන නෞකාවකට ගුවනින් පැමිණි කිසියම් පුපුරණ ද්‍රව්‍ය ඒකකයක් වැදී ඇති බවයි.

එම සිදුවීම හේතුවෙන් නෞකාවේ ගින්නක් හටගෙන ඇති නමුත් පසුව එය මැඩපවත්වා ඇති බවත්, නෞකාවේ සිටි සියලුම කාර්ය මණ්ඩල සාමාජිකයන් ආරක්ෂිතව සිටින බවත් එක්සත් රාජධානියේ නාවික වෙළෙඳ මෙහෙයුම් ආයතනය (UKMTO) පවසයි.

කෙසේ වෙතත්, මෙම සිදුවීම සම්බන්ධයෙන් වගකිව යුත්තේ කවුරුන්ද යන්න මෙතෙක් තහවුරු වී නොමැති අතර, පරිසරයට සිදුවී ඇති බලපෑමක් තිබේද යන්න පිළිබඳවද තොරතුරු තවමත් තහවුරු වී නොමැත.