හිටපු වැලිකඩ OIC ට දූෂණ විරෝධී පනත යටතේ චෝදනා ගොනු කෙරේ

අන්තර්ජාල ජාවාරමක් සම්බන්ධයෙන් අත්අඩංගුවට ගත් චීන ජාතිකයන් 19 දෙනෙකුගේ විදේශ ගමන් බලපත්‍ර නිසි දින අධිකරණයට ඉදිරිපත් නොකර මුදා හැරීම සඳහා රුපියල් ලක්ෂ 3 ක අල්ලසක් ඉල්ලු බව කියන සිද්ධියට අදාලව වැලිකඩ පොලිසියේ හිටපු ස්ථානාධිපතිවරයාහට දූෂණ විරෝධී පනත යටතේ චෝදනා ගොනු කිරීමට අදහස් කරන බව කොළඹ මධ්‍යම අපරාධ විමර්ශන කාර්යාංශය අද (21) කොළඹ ප්‍රධාන මහේස්ත්‍රාත් අසංග එස්.බෝදරගම හමුවේ දැන්වුවා. ඒ සිද්ධියට අදාල නඩුව අද දින කැඳවූ අවස්ථාවේදී. සිද්ධිය සම්බන්ධයෙන් වැඩිදුරටත් අධිකරණයට කරුණු දැක්වු විමර්ශන නිලධාරීන් සඳහන් කර සිටියේ මෙම සිද්ධියට අදාල කාන්තාවක් සම්බන්ධයෙන් පෙර නඩු දිනයේදී අධිකරණයට සඳහන් කළ බවත් සිද්ධියට අදාළව ඇයගෙන්
ප්‍රකාශ ලබාගත් බවත්ය. එම ලබාගන්නා ලද ප්‍රකාශ අනුව මෙම සැකකරු දැනගත්තේ ඇයගේ පියාගෙන් බවත් මෙම සැකකරු ඇයව රවටා මෙම චීන ජාතිකයන් සම්බන්ධයෙන් තොරතුරු ලබා ගත් බවත් විමර්ශන නිලධාරියා අධිකරණයට කරුණු දක්වමින් කියා සිටියා. මෙම චීන ජාතිකයන් 19 දෙනාගෙන් දැනට චීන ජාතිකයන් 16 දෙනෙකුගෙන් ප්‍රකාශ සටහන් කළ ගත් බවත් එක් අයෙක් මේ වන විට වැලිසර රැදවුම් මධ්‍යස්ථානයේ සිටින බවත් අනෙක් දෙදෙනා සොයා ගැනීමට නොහැකි බවත් විමර්ශන නිලධාරීන් අධිකරණයට දන්වා සිටියා. එම අවස්ථාවේ සිද්ධියට අදාල බව කියන කාන්තාව සම්බන්ධයෙන් අධිකරණයේ පෙනී සිටි නීතිඥවරයා සඳහන් කර සිටියේ තම සේවා දායකයාගේ විදෙස් ගමන් තහනම ඉවත් කරන ලෙසයි. එම අවස්ථාවේදී මහේස්ත්‍රාත්වරයා අධිකරණයට දන්වා සිටියේ විමර්ශන පාර්ශවයෙන්වත් අධිකරණයෙන්වත් ඇයව සැකකාරියක් ලෙස නම්කර නොමැති බවයි. නමුත් විදේශ ගමන් තහනම ඉවත්කිරීම සඳහා එම කාන්තාව සම්බන්ධයෙන් ප්‍රකාශය ලබාගත් විමර්ශන නිලධාරියාට මීළඟ නඩු දින අධිකරණයේ පෙනී සිට ඒ සම්බන්ධයෙන් කරුණු දක්වන ලෙස නියෝග කළා. තවද මහේස්ත්‍රාත්වරයා විමසා සිටියේ අල්ලස් කොමිසමට උදෘත යවන්න කටයුතු කරනවද යන්නයි. එම අවස්ථාවේදී විමර්ශන නිලධාරීන් සඳහන් කළේ එලෙස කටයුතු කිරීමට බලාපොරොත්තු වන බවයි. ඒ අනුව සිද්ධියට අදාල නඩුව ලබන 24 යළි කැඳවිමට නියමිතයි. මෙම සිද්ධියට අදාළව වැලිකඩ පොලිස් ස්ථානයේ හිටපු ස්ථානාධිපතිවරයා වන සමන් නිලන්ත කුමාර මේ වන විට රක්ෂිත බන්ධනාගාරගත කර ඇප මත මුදා හැර තිබෙනවා.