ලොව පුරා ජනතාවගේ අවධානය දිනාගත් විනිසුරු ෆ්‍රෑන්ක් කැප්‍රියෝ දිවිගමන නිම කරයි

ලොව පුරා ජනතාවගේ මහත් ගෞරවාදරයට පාත්‍ර විනිසුරුවරයෙකු වූ ෆ්‍රෑන්ක් කැප්රියෝ (Frank Caprio) මියගොස් තිබෙනවා.

මිය යන විට ඔහුගේ වයස අවුරුදු 88ක්.

දීර්ඝ කාලීනව අග්න්‍යාශ පිළිකා තත්ත්වයකින් පීඩා විඳි ෆ්‍රෑන්ක් කැප්රියෝ, ඊයේ (20) දින මියගිය බවයි විදෙස් මාධ්‍ය වාර්තා කළේ.

මිය යාමට පැය කිහිපයකට පෙර, කැප්‍රියෝ සිය ඉන්ස්ටග්‍රෑම් ගිණුමට වීඩියෝවක් එක් කරමින්, තමා රෝහලේ සිටින බවත්, සියලු දෙනාගෙන් තමා වෙනුවෙන් යාච්ඤා කරන ලෙසත් ඉල්ලා තිබුණා.

කැප්‍රියෝ හට අග්න්‍යාශ පිළිකාවක් (pancreatic cancer) වැළඳී ඇති බවට 2023 නොවැම්බර් මාසයේදී රෝග විනිශ්චය කර තිබූ අතර ඔහු මෙම පුවත ෆේස්බුක් වීඩියෝවක් හරහා ලොවට ම හෙළිකර තිබුණා.

අමෙරිකාවේ රෝඩ් අයිලන්ඩ් හි ප්‍රොවිඩන්ස් හි අධිකරණ විනිසුරුවරයෙකු ලෙස සේවය කළ ඔහුගේ සේවා කාලය වසර 40 කට ආසන්නය.

එම කාලය තුළ ෆ්‍රෑන්ක් කැප්රියෝ ලොවපුරා කතාබහට ලක්වූයේ සිය වෘත්තිය තුළ ආදරය, කරුණාව වැනි ගුණාංග ඉස්මතු වන ආකාරයෙන් කටයුතු කළ අයෙක් ලෙසයි.

එනිසාම ඔහු ''අමෙරිකාවේ හොඳම විනිසුරුවරයා" ලෙස කා අතරත් ප්‍රසිද්ධියට පත්විය.

"දයානුකම්පාව, නිහතමානිකම, යහපත් බව, නොසැලෙන විශ්වාසය සඳහා ප්‍රසිද්ධ ආදරණීය විනිසුරු කැප්‍රියෝ, අධිකරණ ශාලාවේ සහ ඉන් ඔබ්බට ඔහුගේ කාර්යයන් හරහා මිලියන ගණනකගේ ජීවිත ස්පර්ශ කළේය. ඔහුගේ කරුණාව ඔහුව දන්නා සියල්ලන් තුළ තබන ලද නොමැකෙන සලකුණකි'' යන්නෙන් ඔහුගේ නිල ෆේස්බුක් පිටුවේ පළ කරන ලද ප්‍රකාශයක සඳහන්.

සමාජ මාධ්‍ය තුළ ඉතාමත් සක්‍රීය චරිතයක් වූ ෆ්‍රෑන්ක් කැප්රියෝ, තමාගේම යුටියුබ් නාළිකාවක් ද පවත්වාගෙන යන ලදී.