බ්‍රසීලයේ ආදිවාසීන් ඇතුළු විරෝධතාකරුවන් පිරිසක්, COP30 සමුළුවට කඩාවදියි

බ්‍රසීලයේ බෙලෙම් හි 'එක්සත් ජාතීන්ගේ දේශගුණික විපර්යාස සමුළුව' (COP30) පැවැත්වෙන ප්‍රධාන පරිශ්‍රයට, බ්‍රසීලයේ ආදිවාසීන් ඇතුළු විරෝධතාකරුවන් පිරිසක් බලහත්කාරයෙන් කඩාවැදී තිබෙනවා.

ඒ, දේශගුණික ක්‍රියාමාර්ග සහ වන ආරක්ෂාව පිළිබඳ ඉල්ලීම් සහ විරෝධතා මුල්කරගෙන බවයි විදෙස් මාධ්‍ය වාර්තා කළේ.

එහිදී විරෝධතාකරුවන් සහ ආරක්ෂකයින් අතර තරමක ගැටුම්කාරී ස්වභාවයක් ද හටගෙන තිබෙනවා.

බ්‍රසීල සහ එක්සත් ජාතීන්ගේ බලධාරීන් සිද්ධිය පිළිබඳව විමර්ශනය කරන බවයි එක්සත් ජාතීන්ගේ සංවිධානය සඳහන් කරන්නේ.

නොවැම්බර් 10 වන සඳුදා සිට නොවැම්බර් 21 වන සිකුරාදා දක්වා නිල වශයෙන් පැවැත්වෙන COP30 සාකච්ඡා සඳහා රටවල් 200 කට ආසන්න සංඛ්‍යාවක නියෝජිතයින් සහභාගී වේ.

සමුළුව බ්‍රසීලයේ පැවැත්වෙන පළමු අවස්ථාව මෙය වන අතර, සාකච්ඡා ඇමසන් වැසි වනාන්තරයේ මායිමේ පිහිටි බෙලෙම් හි සිදුකෙරේ.

දේශගුණික විපර්යාස සහ වන විනාශය හේතුවෙන් තම නිවහනට සිදුවන පාරිසරික හානිය පිළිබඳව විවේචනය කරන ඇමසන් වැසියන් හේතුවෙන්, මෙම ස්ථානය තෝරාගැනීම මතභේදයට ලක්විණ.