බස් රථයක් සහ යතුරුපැදියක් දරුණු අනතුරක් - තරුණයෙක් ජීවිතක්ෂයට

බුත්තල ජනාවාස මාර්ගයේ බුත්තල පොලිස් බල ප්‍රදේශයට අයත් ජනාවාස දහය ප්‍රදේශයේ දී යතුරු පැදියක් සහ පෞද්ගලික සමාගමක සේවකයින් ප්‍රවාහනය කරමින් සිටි බස් රථයක් එකිනෙක ගැටීමෙන් අනතුරක් සිදු වී තිබේ.

එම අනතුරින් යතුරු පැදියේ ගමන් කරමින් සිටි තරුණයෙක් බරපතල තුවාල ලබා බුත්තල ප්‍රාදේශීය රෝහලට ඇතුලත් කර ඇති අතර රෝහලට ඇතුලත් කරන විටත් එම පුද්ගලයා මියගොස් සිටි බව බුත්තල රෝහලේ ප්‍රකාශකයකු පැවසීය.

මෙසේ මියගොස් ඇත්තේ බුරුත පාර බුත්තල ලිපිනයේ පදිංචි වයස අවුරුදු විසි හතක් වන පසිදු දිල්ෂාන් නැමැති තරුණයෙක් බව බව බුත්තල පොලිසිය සදහන් කරයි.

අනතුර සම්බන්ධයෙන් බස් රථයේ රියදුරු බුත්තල පොලිසිය විසින් පොලිස් අත්අඩංගුවට ගෙන ඇති අතර සිද්ධිය සම්බන්ධයෙන් බුත්තල පොලිස් ස්ථානයේ නිලධාරීන් විසින් ඉදිරි විමර්ශන සිදු කරයි.

(ජයන්ත වීරසේකර - වැල්ලවාය)