සෞදි තෙල් නලයට ඩ්‍රෝන ප්‍රහාරය දියත් කළේ ඉරාකයේ සිට - ස්ථානය හඳුනා ගැනේ

සෞදි අරාබියේ නැගෙනහිර–බටහිර තෙල් නල මාර්ගයට ඩ්‍රෝන ප්‍රහාරයක් එල්ල කිරීමට භාවිත කළ බවට සැක කෙරෙන ඩ්‍රෝන දියත් කිරීමේ ස්ථානයක් සිය ආරක්ෂක අංශ විසින් සොයා ගත් බව ඉරාක බලධාරීහු පවසති.

ඉරාක රාජ්‍ය පාලනය යටතේ පවතින ඉරාක ප්‍රවෘත්ති ඒජන්සිය (INA) වාර්තා කළ පරිදි, ඉරාක ආරක්ෂක මාධ්‍ය මධ්‍යස්ථානයේ ප්‍රධානී ලුතිනන් ජෙනරාල් සාද් මාන් සඳහන් කළේ, බුද්ධි හා ආරක්ෂක අංශ ඒකාබද්ධව සිදු කළ මෙහෙයුමකදී අදාළ ඩ්‍රෝන දියත් කිරීමේ උපකරණය සොයාගෙන ඇති බවයි.

ප්‍රහාරය පිටුපස සිටින පුද්ගලයන් සහ කණ්ඩායම් හඳුනා ගැනීම සඳහා අධිකරණ වෛද්‍ය හා තාක්ෂණික විශේෂඥයන් තවදුරටත් පරීක්ෂණ සිදු කරමින් සිටින බවද ඔහු පැවසීය.

එමෙන්ම, පරීක්ෂණයට එක්වී එහි ප්‍රතිඵල සමාලෝචනය කිරීමට ඉරානය කළ ඉල්ලීමට ඉරාක අග්‍රාමාත්‍යවරයා සහ ආරක්ෂක ප්‍රධානියා ලෙස කටයුතු කරන අධිකාරිය අනුමැතිය ලබාදී ඇති බවද ඔහු සඳහන් කළේය.

ප්‍රහාරය සම්බන්ධ බුද්ධි තොරතුරු හුවමාරු කර ගැනීම සඳහා ඉරාකය සෞදි බලධාරීන් සමඟ සෘජු සම්බන්ධතා පවත්වාගෙන යන බව මාන් පැවසීය.

බ්‍රහස්පතින්දා ඉරාකයෙන් දියත් කළ බවට සැක කෙරෙන ඩ්‍රෝන කිහිපයක් සෞදි අරාබියේ රියාද් සහ මදීනා ප්‍රදේශවල පිහිටි නැගෙනහිර–බටහිර තෙල් නල මාර්ගයට එල්ලවි තිබිණි.

ලෝකයේ තෙල් සැපයුමෙන් සියයට 4ත් 5ත් අතර ප්‍රමාණයක් ප්‍රවාහනය කරන මෙම නල මාර්ගය, හෝමුස් සමුද්‍ර සන්ධිය මඟහැර තෙල් ප්‍රවාහනය කිරීමට සෞදි අරාබියට ඉඩ සලසන ප්‍රධාන මාර්ගයකි.

ප්‍රහාරයෙන් පසු ආරක්ෂක පියවරක් ලෙස නල මාර්ගයේ මෙහෙයුම් තාවකාලිකව නතර කිරීමට සෞදි බලධාරීහු පියවර ගත්හ.

ප්‍රහාරයට ප්‍රතිප්‍රහාරයක් එල්ල කිරීම මේ අවස්ථාවේදී සිදු නොකිරීමට සෞදි අරාබිය තීරණය කර ඇති අතර, එම තීරණයට ඉරාක රජයේ ඉල්ලීමද බලපා ඇති බව වාර්තා වේ.

සෞදි බලධාරීන් ප්‍රහාරයේ ඩ්‍රෝන දියත් කළ ස්ථානය ලෙස හඳුනාගෙන ඇත්තේ ඉරාකයේ ගිනිකොනදිග පිහිටි මයිසාන් පළාතයි. ඉරාන දේශසීමාවට ආසන්න මෙම ප්‍රදේශයේ ඉරානයට හිතවත් සන්නද්ධ කණ්ඩායම් දිගු කලක සිට ක්‍රියාත්මක වන බවද වාර්තා වේ.