''අම්මාගේ සහායෙන් කියනවට වඩා, ඇය තමයි මම අද ඉන්න තත්ත්වයට හේතුව වුණේ කිව්වොත් හරි..'' - ප්‍රවීණ රංගන ශිල්පිනී කෞෂල්‍යා ප්‍රනාන්දු

කෞෂල්‍යා ප්‍රනාන්දු, මේ දවස්වල වැඩියෙන්ම කතාබහට ලක්වෙන රංගන ශිල්පිනිය කිව්වොත්,, ඔබ ඊට එකඟ වෙයි.

කාලයක් තිස්සේ ලාංකේය කලාවේ සුවිශේෂී සලකුණු තබමින් ඇය සාර්ථක ගමනක් යනවා.

ආසන්තම වශයෙන් මේ දිනවල අති සාර්ථක අන්දමින් තිරගත වන, ''නීරා'' ''මෝඩ තරිඳු'' සිනමාපට දෙකෙන්ම ඇය ඔබ හමුවට එනවා.

ඒ, සුපුරුදු විදියටම අමතක නොවන චරිත නිරූපණයන් තුළින්.

අපිට එහෙම සමීප කෞෂල්‍යා ප්‍රනාන්දු, කියන්නෙ ලාංකේය වේදිකාව පෝෂණය කිරීම උදෙසා සුවිශේෂී කැපවීමක් කළ නාට්‍යවේදිනියක හා රංගන ශිල්පිනියක වන සෝමලතා සුභසිංහගේ ආදරණීය දියණිය.

අම්මා වගේම දුවත්, ඉදිරි පරම්පරාවන්ට රංගනය හදාරන්න වටිනා රංගශාලා කිව්වොත් හරි.

මහාචාර්ය එදිරිවීර සරච්චන්ද්‍ර නාට්‍ය නිර්මාණ ඔස්සේ කරළියට පිවිසි සෝමලතා සුබසිංහ මූදු පුත්තු, ලිය තඹරා, එලොව ගිහින් මෙලොව ආවා, හිරු නැති ලොව, අන්ගාරා ගඟ ගලා බසී වැනි නිර්මාණ තුළින් ප්‍රකට කළ රංගන කුසලතාව සුවිශේෂීයි.

ළමයින් සඳහා නාට්‍ය රැසක් නිර්මාණය කළ ඇය වේදිකා නාට්‍ය රචනය සහ අධ්‍යක්ෂණයෙන් දෙස් විදෙස් හි ප්‍රකට නාට්‍ය ගුරුවරියක් ද වනවා.

දේශීය ළමා නාට්‍ය කලාවේ අභිවෘද්ධිය වෙනුවෙන් පුරෝගාමී මෙහෙවරක් කළ ඇය "ඇන්ටිගනී" "යදම්" "හිමකුමාරි" 'පුංචි අපිට දැන් තේරෙයි" "වලස් පවුල" "විකෘති" වැනි නාට්‍ය නිර්මාණයන් ඔස්සේ ශ්‍රී ලාංකේය ළමා නාට්‍ය ඉතිහාසයේ නොමැකෙන සටහන් තැබූ කලාකාරිනියක්.

ඒ වගේම මෙරිල් ඇල්බට්ගේ "දාහකින් එකෙක්" චිත්‍රපටයෙන් සිංහල සිනමාවට අවතීර්ණ වූ ඇය "මඩොල් දූව" "සිරිබෝ අයියා" "විරාගය" "පරසතුරෝ" "තිලක සහ තිලකා" "අරුණට පෙර" "මහගෙදර" "ගුරුගෙදර" සහ "මේ මගේ සඳයි" වැනි චිත්‍රපට ගණනාවකට ස්වකීය රංගන දායකත්වය ලබාදුන්නා.

ඇය ජීවතුන් අතර නොමැති වුවත්, කලාවට ඈ දායාද කළ නිර්මාණ සේ ම ඇගේ දියණියත් වටිනාම සම්පත් අතර වනවා.

කෞෂල්‍යා ප්‍රනාන්දු වරෙක සිය මව ගැන හරි අපූරු කතාවක් කියලා තිබුණා. ඒ තමන් කලාවට ආවේ අම්මාගේ සහයෙන් නොව, ඇය තමයි තමාව අද ඉන්න තත්ත්වයට හේතුව වුණේ කියලා.

''ඇගේ සහායෙන් කියනවට වඩා ඇය තමයි මම අද ඉන්න තත්ත්වයට හේතුව වුණේ කිව්වත් හරි. ඒ වගේම මගේ පියාත්. ඔවුන් දෙන්නම මට අවශ්‍ය උපදෙස්, ගුරුහරුකම්, අවශ්‍ය සහයෝගය ලබාදුන්නා.

මං ක්ෂේත්‍රයට පිවිසෙන්නේ වේදිකාව හරහා.

මුලින්ම අම්මත් එක්කම ළමා නාට්‍යවල රඟපෑවා. ඊට පස්සේ තමයි අම්මගේ විකෘති කියන වේදිකා නාට්‍යයට සම්බන්ධ වුණේ. ඊට පස්සේ ෆින්ලන්ත ජාතික අධ්‍යක්ෂවරයෙකුගේ නාට්‍යයකට සම්බන්ධ වෙන්න අවස්ථාව ලැබුණා.

ඊට පස්සේ සුගතපාල සිල්වාගේ මරාසාද් වගේම ධර්මසිරි බණ්ඩාරනායකගේ ධවන භීෂණ නාට්‍ය සඳහා රංගනයෙන් දායක වුණා. ඒත් එක්කම මට රඟපාන්න පුළුවන් කියන විශ්වාසය අධ්‍යක්ෂවරුන් අතර ඇතිවෙන්න පටන් ගත්තා. ඊට පස්සේ දිගින් දිගටම මට වේදිකාවට ආරාධනා ලැබුණා. ඒ අතරේ අම්මගේ නාට්‍යවලත් රඟපෑවා...''