ප්‍රංශයේ විරෝධතා පොලිසියේ පාලනයෙන් ගිලිහි යයි - 350කට අධික පිරිසක් අත්අඩංගුවට

ප්‍රංශයේ පැරිස් නුවර පවතින විරෝධතා අතරතුර ඊයේත් අදත් පුද්ගලයන් 350කට අධික පිරිසක් අත්අඩංගුවට ගෙන ඇති බව ප්‍රංශ බලධාරීහු පවසති.

සති අන්තයේදී ප්‍රංශයේ නගර කිහිපයක පැවති විරෝධතා අතරතුර ඇතැම් ප්‍රදේශවල තත්ත්වය පාලනය කරගැනීමට පොලිසියට නොහැකි වූ බව අභ්‍යන්තර කටයුතු අමාත්‍ය ලෝරන්ට් නුනෙස් පිළිගෙන තිබෙනවා.

ප්‍රංශ පුවත් සේවය (AFP) වාර්තා කළ පරිදි, ප්‍රචණ්ඩකාරී සිදුවීම්වලට පෙර ඒවා පිළිබඳ ප්‍රමාණවත් පූර්ව සූදානමක් නොතිබූ බව ද අමාත්‍යවරයා සඳහන් කර ඇත.

සිදුවීම් සම්බන්ධයෙන් තමන් වගකීම භාරගත යුතු බව හැඟුණු බැවින්, සිය ධුරයෙන් ඉල්ලා අස්වීම සඳහා ජනාධිපති එමානුවෙල් මැක්‍රොන් මහතා වෙත ඉල්ලා අස්වීමේ ලිපිය ඉදිරිපත් කළ බව ද නුනෙස් මහතා පවසා තිබේ.

කෙසේ වෙතත්, අමාත්‍යවරයාගේ ඉල්ලා අස්වීම ජනාධිපති මැක්‍රොන් මහතා විසින් මෙතෙක් පිළිගෙන නොමැත.

විරෝධතා අතරතුර ඇති වූ ප්‍රචණ්ඩකාරී තත්ත්වයන් සහ ඒවා පාලනය කිරීමේදී පොලිසිය මුහුණ දුන් අභියෝග හමුවේ, ප්‍රංශ ආරක්ෂක අංශවල ක්‍රියාකාරීත්වය පිළිබඳව ද අවධානය යොමුව තිබේ.