''මගේ චිත්‍රපටවල ආදායම් ගැන බයවෙන්න ඕනි නෑ. මගේ චිත්‍රපට හැම එකක්ම වාර්තා තියලා තියෙනවා..'' - සෝමරත්න දිසානායක

ආචාර්ය සෝමරත්න දිසානායකයන්ගේ නවතම සිනමා නිර්මාණය, 'Rapist'

එහි මුහුරත් උළෙල පසුගියදා පැවැත්වුණා.

රේණුකා බාලසූරිය හා ෂෙහාන් සපරමාදු විසින් නිෂ්පාදනය කරනු ලබන මෙම සිනමා පටය සජිත අනුත්තර, අභිලාෂි සන්තුෂ්කි, සනත් ගුණතිලක, නදීකා ගුණසේකර, සෙනාලි ෆොන්සේකා, සරත් කුලාංග, හෂිනිකා කරලියද්ද ඇතුළු නළු නිළියන් රැසකගේ රංගනයෙන් හැඩවනු ඇති.

මෙහි කතා තේමාව දරුවකුගේ අපයෝජන සිද්ධියක් වටා ගෙතේ.

නමුදු චිත්‍රපටයෙහි දූෂණය කිරීම සම්බන්ධයෙන්වත් අසැබි දර්ශන කිසිවක් අන්තර්ගතව නොමැති බවත්, දූෂණයට නතු වුණ දරුවෙක් බේරාගැනීමේදී පුද්ගලයෙක් මුහුණපාන සිදුවීමක් වටා නිර්මාණය සිදුව ඇති බවත් සඳහන්.

චිත්‍රපටය පිළිබඳව සෝමරත්න දිසානායකයන් දක්වන ලද අදහස් කිහිපයකි මේ....

''දරුවකු දූෂණය වීම සම්බන්ධයෙන් කතාවක් තමයි සිනමාවට නැඟෙන්නේ. නමුත් මෙහි දූෂණය කිරීම සම්බන්ධයෙන්වත් අසැබි දර්ශන මොකක්වත් නැහැ. දූෂණයට නතු වුණ දරුවෙක් බේරාගන්න ගිහිල්ලා අහිංසකයෙක් අමාරුවේ වැටුණු කතාන්දරයක් තමයි තියෙන්නේ.

ඔය වගේ දේවල් සංසිද්ධීන් තියෙනවානේ. දැන් හිතන්නකෝ, සමහර වෙලාවට පොලිසියේ, අධිකරණයේ තිබෙන සිදුරු හරහා නිවැරදිකරුවන් වැරදිකරුවන් වෙනවා . ඉතින් උසාවියත් තීන්දු ලබාදෙන්නේ ලැබෙන සාක්ෂි සහ තිබෙන සාධක මතනේ. ඉතින් එහෙම වුණහම සමහර වෙලාවට නිවැරදිකරුවො වැරදිකරුවො වන අවස්ථා තියෙනවා.

ඒ වගේම වැරදිකරුවො සොයාගන්න බැරිව ඔවුන් නිදහසේ ඉන්න අවස්ථාත් තියෙනවා. ඉතින් ඒ විදියේ දේවල් අපි සමාජයේ දකිනවානේ. අනෙක් එක තමයි හුඟක් පාරවල්වල හදිසි අනතුරක් හෝ යම්කිසි අනතුරක් වුණහම පාරෙ යන අය උදව් කරන්න ඉදිරිපත් වෙනවානේ. ඒ වෙලාවට ඉදිරිපත්වන අය ඉදිරිපත් වෙන්නේ මානුෂීය හැඟීම් අනුව. නමුත් ඔවුන්ටත් උසාවිවලයි, පොලිසිවලයි, සාක්කි කූඩුවල රස්තියාදු වෙන්න සිද්ධ වෙනවානේ. ඒක හින්ද ගොඩක් අය උදව් කරන්නත් මැළි වෙනවානේ. ඉතිං එහෙම දෙයක් දැකපු වෙලාවක තමයි මට ඔය සංකල්පය ඔළුවට ආවේ. මේ පිටපත ලියල ටිකක් කල්. නමුත් අපිට චිත්‍රපටයක් නිෂ්පාදනය කිරීමේ ආර්ථික ගැටලු තිබුණානේ.

කොවිඩි වසංගතය හින්දා අපි සුනාමි චිත්‍රපටයෙන් අතරමං වුණා. ඊට පස්සෙ අපි ආයෝජකයො සොයමින් තමයි නිර්මාණ බිහි කළේ. ඒක හින්දා මේකටත් අපි ආයෝජකයො සොයනවා. කොටසකට කෙනෙක් සම්බන්ධ වෙලා ඉන්නවා සම නිෂ්පාදකයෙක් විදිහට, තවත් කාටහරි සම්බන්ධ වෙන්න අවස්ථාව තියෙනවා...''

''චිත්‍රපටයක් කරනවා කියන එක ලොකු අභියෝගයක්. ඉස්සර වගේ නෙමෙයි වියපැහැදම් වැඩියි. හැබැයි ඒකෙ අනෙක් පැත්තකුත් තියෙනවා. වියදම් වැඩියි වගේම ආදායමත් වැඩියි. ප්‍රවේශ පත්‍රයක මිලත් ඉහළයි. විශේෂයෙන් මගේ චිත්‍රපටවල නම් ආදායම් ගැන බයවෙන්න ඕනෑ නැහැ. ඉතිහාසයේ මගේ චිත්‍රපට හැම එකක්ම වාර්තා තබල තියෙනවානේ. දේශීය සිනමාවේ වැඩිම ප්‍රේක්ෂක සංඛ්‍යාව, වැඩිම ආදායම කියන වාර්තාව තියෙන්නෙත් මට. මේ චිත්‍රපටයෙත් ආදායම ගැන නම් මට කිසිම සැකයක් නැහැ...''

උපුටාගැනීම : මීවිත | දිනේෂ් විතාන