ඉරානයට එරෙහි මෙහෙයුම්වලට ඊශ්‍රායලයත් ? - තීරනය ට්‍රම්ප් ජනාධිපති අතේ

ඇමරිකානු ජනාධිපති ඩොනල්ඩ් ට්‍රම්ප් ඉල්ලීමක් කළහොත්, ඉරානයට එරෙහිව ඇමරිකාව සිදුකරන ඕනෑම හමුදා මෙහෙයුමකට සහාය දීමට ඊශ්‍රායලය සූදානම් බව ජෙරුසලම New York Post වෙත ප්‍රකාශ කර තිබෙනවා. "අවශ්‍ය වුවහොත් නැවතත් අපි එය කිරීමට සූදානම්. ඇමරිකාව සමඟ අපි සිටින බව දැනටමත් ඔප්පු කර තිබෙනවා. කෙසේ වෙතත්, මේ අවස්ථාවේදී ඊශ්‍රායලයේ සෘජු සහභාගීත්වය ඇමරිකාවට අවශ්‍යද යන්න අපට නිශ්චිත නැහැ," යැයි ඊශ්‍රායලයේ ඉහළ බලධාරියෙකු පවසා ඇතැයි The Jerusalem Post පුවත්පත වාර්තා කරනවා. එමෙන්ම, The Jerusalem Post පුවත්පතට ඊශ්‍රායල ආරක්ෂක හමුදා (IDF) නිලධාරීන් ප්‍රකාශ කර ඇත්තේ, මේ මොහොතේ ඇමරිකාව සහ ඉරානය අතර ගැටුම්වලට සෘජුවම සම්බන්ධ වීමට සැලසුමක් නොමැති නමුත්, ඕනෑම තත්ත්වයකට මුහුණ දීමට හමුදාව සූදානම් බවයි. ඔවුන්ගේ වත්මන් ඇගයීම අනුව, ඉරානයද මෙම ගැටුමට ඊශ්‍රායලය ඇද ගැනීමට බලාපොරොත්තු නොවන අතර, නුදුරු කාලයේදී ඊශ්‍රායලය ඉලක්ක කර ප්‍රහාර එල්ල වනු ඇතැයි අපේක්ෂා නොකෙරන බවද ඊශ්‍රායල හමුදා බලධාරීන් පවසා තිබෙනවා. මේ අතර, ඇමරිකානු මධ්‍යම හමුදා විධානය (CENTCOM) ප්‍රකාශ කළේ, හෝර්මුස් සමුද්‍ර සන්ධියේදී වාණිජ නෞකා සහ අහිංසක සිවිල් නාවික කාර්ය මණ්ඩලය ඉලක්ක කර සිදුකළ ප්‍රහාරවලට ප්‍රතිචාර වශයෙන් නව ප්‍රහාර ක්‍රියාත්මක කළ බවයි. එසේම, ඩොනල්ඩ් ට්‍රම්ප් ප්‍රකාශ කළේ, පසුගිය රාත්‍රියේ සිදුවූ ඇමරිකා–ඉරාන ගැටුම්වලින් පසුව ඉරානය සමඟ පැවති අවබෝධතා ගිවිසුම (MoU) තවදුරටත් වලංගු නොවන බවට තමන් සලකන බවයි.